August 2, 2022; Tunhnai kum li (2018-2021) chhung khan Mizoramah, fur lai (June - September) a ruahtui tla chu ruahtui tlak dan tur pangngai (average i.e., 1289.9 mm) leh IMD-in Long Period Average a siam (1438.3 mm) aiin a tlem ziah a, kumin 2022 ah pawh ruahtui tlak dan pangngai pha lo (below normal) tura thlirlawk a ni.

State Meteorological Centre, Directorate of Science and Technology-in a chhinchhiah danin, kum 36 chhung (1986-2021) khan fur laiin (June -Sepetember) kum tin ruah mm 1289.9 sur ang a ni a. Kum 2017 kha fur chhung bika ruahtui tlak tam ber kum niin June - September chhungin mm 1836.0 a tla a. Kum 2020 kha fur chhung bika ruahtui tlak tlem ber kum a ni a, June - September chhungin mm 856.4 chauh ruahtui a tla.

India Meteorological Department thlirlawkna ang chuan, kumin furah India ram pum chhutin, ruahtui tlak dan pangngai (normal i.e., 96% to 104% of Long Period Average)-in a tla tura ngaih a ni a. Hetihlai hian Mizoram bikah chuan ruahtui tlak dan pangngai pha lo (below normal i.e., 90% to 96% of Long Peiord Average) ni tura ngaih a ni. 

Mizoram bakah India ram chhak lam leh hmar chhak lam ho tan chuan Long Period Average hi 143.83 cm (1438.3 mm) a ni a, IMD thlirlawkna ang chuan kumin fur chhungin Mizoramah mm 1294.47 leh mm 1380.77 inkar ruah tla tura ngaih a ni.

India Meteorological Department chuan May 31, 2022 khan fur chhunga ruahtui tlak dan tur thlirlawkna (Long Range Forecast for the 2022 Southwest Monsoon Season Rainfall) leh June thla chhunga khawchin thlirlawkna a tichhuak a.

State Meteorological Centre, Directorate of Science and Technology, Government of Mizoram chuan, India Meteorological Department thlirlawkna atang leh meteorological data record a neih atangin mipuite tana hriat thiam awlsam thei tur ang berin he thlirlawkna hi a buatsaih thin a ni.