October 27, 2022; Mizoramah Dengue vanga thi mi 2 chhinchhiah an awm tawh a, hetihlai hian kumin chhunga Dengue vei hmuhchhuah zawng zawng zat chu 372 a tling tawh.

Dr. Hmingthanmawii, Joint Director (Malaria) hnen atanga ZALEN thudawn danin, office lamin a kimchangin report la dawng chiah lo mahse, tun thlenga an hriat theih chinah kumin ah Dengue vanga thi mi 2 chhinchhiah (confirm) an awm tawh a, October ni 23, 2022 thleng khan Mizoramah Dengue vei hmuhchhuah 372 an awm tawh.

Mizoramah Dengue vei hi kum 2016 ah mi 580 hmuhchhuah an lo ni tawh a, 2017 ah 136, 2018 ah 68, 2019 ah 131, 2020 ah 67 leh nikum 2021 khan 83 hmuhchhuah a lo ni tawh.

Mizoram sawrkar thuchhuah tarlan danin, Dengue hi natna chi khat virus in a thlen a ni a. He natna hrik (virus) hi thosi in a pu darh thin a, chuvangin thosi seh atanga inkaichhawn theih a ni.

Dengue natna thehdarhtu thosi hi thosi chi khat Aedes aegypti (a dum leh a var tial rik rek), Mizo ten thosi rang kan tih hi a ni. Aedes thosi te hian vawi khat Dengue hrik a pai tawh chuan a damchhungin a pai reng a, a seh apiang ten Dengue natna an kai thin. Malaria thlentu thosi te anglo takin Aedes thosi te hian chhun khaw en laiin mi an seh deuh ber thin.