Aizawl April 2, 2022 : 2021-2022 chhung khan khaw 111 atangin Oil Palm chingtu ten company te hnenah Oil Palm rah metric tonne 5254 ( Rs 289,00,000 - cheng nuai zahnih sawmriat pakua man) an hralh. Nimin khan Oil Palm rah hralhna man bithliahtu committee 'Price Fixation Committee on Oil Palm Fresh Fruit Bunches' chuan kg khatah Rs.5.50 ni thin chu kg khatah Rs. 10.0 ni turin an rel. 

Nimin khan Secretariat Conference Hall, MINECO-ah "Price Fixation Committee on Oil Palm Fresh Fruit Bunches' chu an thukhawm. He meeting hi Pu J.Hmingthanmawia, Secretary, Agriculture Department chuan a kaihruai a. District hrang hrang atanga Oil Palm chingtu aiawhte’n harsatna hrang hrang an tawh te leh Oil Palm rah hralhna rate hman mek kg khatah Rs.5.50 chu tihsan hun hle a an hriat tawh thu an sawi. 

Oil Palm rah leitu Company atangin Godrej Agrovet Ltd. leh Ruchi Soya Industries Ltd. ten Oil Palm rah an lei chung changa harsatna an tawh te an sawi bawk a. Meeting chuan Oil Palm rah hralhna rate hman mek chu vawin April Ni khat atanga hman tan turin kg khatah Rs.10 a tihsan nise an ti. Tuna rate thar hi India sorkar-in viability price a kalpui hma a hman tura tih a ni.

Meeting-ah hian District hrang hranga Oil Palm chingtu aiawh, company aiawh leh state sorkar aiawh in Agriculture Department leh Finance Department aiawh te an tel a ni.