Aizawl: AH & Vety department chuan Mizoramah ranvulh chhiarpui neiin tun hnai khan an chhiarpui neih hi tarchhuah a ni a, Mizoram ranvulh zingah Ar a tam ber.

AH Vety department hian nikum 2019 khan chhiarpui hi an nei a, an data hi sawrkar laipuiah thawnin tun hnai khan sawrkar laipui chuan mipui hmuh theihin a tlangzarh a. Chhiarpui atanga a lan danin Mizoramah ranvulh chi 11 bawng, lawi, sial, beram, kel, vawk, sakawr te, sabengtung, ui, sazupui leh ar/sava lam chi (ar, varak, turkey, sava) te chhiarpuiah hian chhinchhiah an ni a, a vaia ranvulh chhinchhiah hi 24,77,724 a ni. Ranvulh zingah hian a mal khaiah ar chu tam berin 2,034,899 a awm a, hei hi ranvulh zawng zawng atanga chhutin 5% a tling a ni. Ar dawtah hian vawk chu tam berin 2,92,465 a awm a, ui 69,860 leh bawng 45,701 ten an dawt a ni.

Ran chhiarpui hi kum 2012 khan neih a lo ni tawh a, chuta tanga a lan danin ran awm zat hi pung mah se lawi, beram, kel, sakawr tê chi, sazupui leh turkey-ah te chuan chhiarpui neih hmasak a phak lo a ni.

AH Vety department chuan ran chhiarpui chu thil tih harsa tak niin an sawi a. Ni tin ran chu piang leh thi an awm zel avangin chhiarpui neih laia an chhiar dan chu an report-ah hian an tar lang nia sawiin hei hi a tuk lawkah a danglam nghal thei zel niin Zalen an hrilh bawk.