Aizawl: Mizoram journalists' Association President atana puan nawn Zonunsanga khiangte chuan, "MJA hi Association zingah chuan member te inpawh tawnna ber leh inelrelna awm lohna ber pawl a ni," a ti.

Kum 2020-2022 chhunga Mizoram Journalists' Association General Headquarters hruaitute puanna inkhawm Zirtawpni kaltaa Aizawl Press Club-a neih ah he thu hi sawiin MJA President thar chuan, "Tuna hruaitute hi mifel leh a tha ber thlankhawm kan ni lo a, mi tling lo tak takte kan ni. Hun kal tawhah member-te kan intawiawmna zawng zawngah lawmthu ka sawi a. Kan tlin loh ang angin term tharah pawh a hma ang bawka tha taka intawiawm leh turin ka sawm che u a ni," a ti a. "Kan mizoa leh culture duhawm tak tak te hi i vawng nung zel ang u," tiin hruaitute tlin lohnaah hnunglam atanga inrel mai loa, hmaichhana infinchhuaha tangrual zawk turin a sawm. Covid-19 leng chu journalist-ten an tuar nasa hle tih sawiin, a bikin print media-ten an tawrh zual thu leh, thenkhat tan phei chuan an dingchhuak leh thei angem tih pawh hriat loh a ni tih a sawi a. Covid vangin Mizorama journalist-te zaah 99 an la him nia a lan thu leh a kai chhun pawh rei enkawl ngai loin dam taka a chhuah leh tawh thu sawiin lawmawm a tih thu a sawi bawk.

Kum 2018-2020 chhunga MJA hruaitu thar puanna inkhawm hi MJA President Zonunsanga Khiangte in a kaihruai a, vice pressident hlui T.Lalhmachhuana'n hunserh a hmang a; MJA general conference inkara hmalakna leh chetvelna hrang hrang tarlanna - General Report chu general secretary Zohmingmawia'n a pe a, MJA treasurer C.Lalhmachhuana chuan pawl sum lut leh hman dan tarlanna - Finance Report a pe a, sawifiah ngaite sawifiah a nih hnu ah member kalkhawmte chuan ban dinglam pharin an pawm a ni. Hruaitu thar puanna hunah hian kum 2019 atanga 13.11.2020 inkara MJA member mi 5, chatuan ram panta te sunna hun hman a ni bawk.

Hun hnihna hi MJA ex-officio Vanlalrema Vantawl chuan kaihruaiin Covid 19 hrileng vanga MJA hruaitu thar thlan theih a nih loh dan te, MJA executive meeting leh district hrang hrang MJA te rawn an nih hnuaah tuna hruaitu ni lai te hian kum 2020-2022 term chu chelh zui se tia lungrual taka thutlukna siam a nih thu a sawi a, hemi hnu hian MJA General Hqrs. hruaitu thar turte hi a puang a ni.

Tuna hruaitu atana pawm tharte hi elected OB 3 leh elected executive member 10-te an ni a. President hian MJA dan bu tlawhchhanin nominated member 5 a ruat tha leh nghal a, appointed secretary-te pawh a ngai a ruat leh a, executive member atan a hmaa ruat ni lo, ruat thar pakhat a nei a ni. MJA Gen. hqrs. hruaitu thar te hi president Zonunsanga Khiangte, vice president Lalremsiama, treasurer C Lalhmachhuana, general secrertary Zohmingmawia, secretaries Lal Rinmawia, Lalnunzira Chawngthu, Joseph Lalnuntluanga te an ni a. Executive member te chu BK Renthlei, Lalrinmawia Sailo, Chhuanvawra, Alfred Vanchhawng, J.Malsawmzuala Vanchhawng, K.Zothanpara, H.Lalchhandama, C.Lalzamlova, A.Zotinkhuma, K Zothankhuma leh ruat thar K.Zabiaka te an ni.