Aizawl June 29, 2023 : Mizoram Journalist Association, Kolasib District te chuan Mizoram chak lakna kawngpui, Kolasib district chhunga lirthei tana zawh harsa te chu an tlawh a, vawiin atang khan NHIDCL contractor pakhat chuan khuar awm te hnawhin 'temporary repair' hi a thawk tan a, PWD hnuaia contractor chuan kar tharah pot hole hnawh hna hi thawh an tum tih an sawi.

Kolasib district chhungah National Highway kawngpui hi Vairengte leh Bilkhawthlir inkar bakah Kolasib atanga Kawnpui inkar te a chhe zual. Thudawn danin ruah sur avangin kawng a diak bakah kawng a nâl a, mihring tan pawh kaltlang harsa khawpa a awm thin vangin darkar 3 te lirthei a tangkhang chang pawh a awm thin niin hriat a ni.

Kawngte hi NHIDCL hnuaia contractor Ratna Infrastructure te enkawl ni mah se, Central PWD hnuaia contractor pakhat Sanjit Baruah, Guwahati chuan kawngsir tihfai leh pot hole hnawh bakah hna tenau dang te an thawk. Kolasib district NHIDCL hotute chuan hemi atan hian contract agreement engmah an siam loh thu leh an hnathawh a zirin pawisa hi an inpek thin thu an sawi. NHIDCL te hian lung an pe a, contractor hian labour ngaihtuahin pot hole hnawh hna hi an thawk a ni.

MJA ten an tlawh laiin Sethawn kawngchhiat zualna hmunah hian labour 18 an awm a, JCB 1 bak khawl dang engmah dah an nei lo. Tuihawk luankawr (side drain) ah te leivung tharlam tam tak dah a ni a, hei hi kawngpuia tui a luanna chhan leh tuitling siama kawng a chhiat chakna chhan nia an hriatthu an sawi. 

NHIDCL hotute chuan kawng siam tur hian contractor Ratna Infrastructure te chhawr reng mah se, thla 6 chhung atan Sanjit Baruah kutah Kolasib district chhung kawngpui - Vairengte to Bilkhawthlir (28km) leh Kolasib Leitan to Kawnpui (23km) te hi an dah thu MJA te hi an hrilh a ni.

Mizoram PWD kuta la awm Bilkhawthlir Kharzawl thlen hma atanga Kolasib Leitan inkar (25km) leh Kawnpui Bazar atanga Khamrang inkar pawh hmun tam takah a khuar a, heng kawng te siam tur hian PWD chuan contractor Sadguru ruaiin tunah hian 'defect liability period-DLP' ah a awm a, department lamin siamthat hna hi 'direct' in an khawih thei lo tih an sawi. PWD Highway Division-III changtu Er R Lalduhthlanga, Executive Engineer chuan, "Sadguru te hnenah hian siamtha turin kan hrilh tawh a, an siam loh chuan an bill pawh hren sak kan tum thu kan hrilh. Anni hian Idu'l Zuha avangin tunkarah hna an thawk tan thei lova, kar thar atangin thawh an tum thu an sawi," a ti.

Kolasib District MJA president Andrew VL Auva chuan Mizoram chak lakluhna kawngpui ber enkawl dan chu a fel lo tih a sawi a, mipui hmakhaw ngaiin tun ang lo deuha enkawl a tul thu a sawi. "Hetianga contract mumal tak pawh awm lova kawngpui pawimawh enkawl a ni hi Mizo mipui ang pawha kan tanrual hun tak a niin ka hria. Tunah fur a ni a, kum dangah pawh hetiang hun hi kan kawngpui neihte a chhiat hunlai a ni thin. Chuvangin kan mamawh zawng zawng lakluhna kawngpui hi sorkar pawhin ngaihpawimawh zualah nei se, MJA te pawh mipui tana hmalakna kawngah a tul a nih chuan court-a kal pawh kan hreh ka ring lo," a ti.