Aizawl: Mamit tlawh mektu MJA, Kolasib district te chuan nimin khan Kanhmun-a ramri duty te an tlawh.

Kanhmun-ah hian Tripura leh Assam atanga rawn lutte chu uluk takin screening neihsak an ni a, Tripura lam atanga rawn lutte hi tangkhang deuh vek niin Mizoram sawrkar home department lamin phalna an pek sa te an ni a, screening point-ah hian sawrkar atanga phalna an neih leh neih loh enfiah sak nghal thin an ni. Assam state atang hi chuan bungrua deuh chauh a rawn lut thin a, engemaw changin tangkhang tlem a zawng an rawn lut bawk. Heng te hi screening point-ah uluk takin enfiah an nih thu a hmuna duty Dr Lalbiaknunga chuan a sawi.

State sawrkarin inkharkhip a thlahdul hnuah Kanhmun kaltlanga tangkhang lo lut te hi nitin mi 10 vel awm angin a ngaih theih a, Mizoram an rawn thlen hnuah an awmna tur district-a quarantine facility-ah dahluh nghal thin an ni.

Hetih lai hian Assam atanga bungrua rawn kal tam tak hi inbanlekin lakluh thin a ni a, hengah hian bungraw neitu ten Assam ramri duty-na Medili lui atangin an lo la mai thin. Amaherawhchu hmun hla zawk kalpui tur chi bung-rua leh eirawngbawlna gas phur motor-te chu chlorine water hmanga an kah thianghlim hnuah Mizoram chhungah tlang tir an ni thin thung. Assam atang hian chawhrualin nitin motor 10 vel lo lut thin anga chhut a ni.

Kanhmun khuaa ramri-ah hian police te leh health department atangin duty an awm reng a, lirtheite hi Mizoram-ah a lo luh theih hun chhung siamsak thin an ni bawk.