Aizawl September 8, 2022 : National Eye Donation Forthnight vawi 37na kharna chu vawiin khan Eye Care Hospital, Dawrpui bultumin Eye Care Hospital-ah hman a ni. MJA Vice President Lalremsiama chu khuallian niin a hmanpui. Kumin thupui atan hian 'Nang erawh chuan i hmu thei' tih hman a ni. He hunah hian RIPANS 3rd Year Bsc. Optometry, Mizoram Optometrist Association, Mizoram Ophthalmic Association bakah Staff of NPCBVI, Mizoram te an tel.

MJA Vice President Lalremsiama chuan, "Eye Care Hospital-in Mit thalo te tana ruahmanna fel tak an nei hi a lawmawm. Mit that loh avanga damlo ten phailam pan a, sum tam zawk sen ngai lova Mizorama chhunga Eye Care hospital a awm hi a lawmawm hle a ni. Eye donation lama hmalakna tur leh mipui lama hrilh hriatna turah MJA ten tih tur kan nei a nih chuan kan theih tawk kan lo chhuah ang," a ti.
 
Remsiama chuan, Mizoram-ah hnamdang mamawh lo tura theihtawp chhuah turin RIPANS zirlaite a fuih a, Mizoram tana chhenfakawm taka zir chhuak turin a chah bawk. 

He hunah hian Cornea (mit darthlalang) pawimawhna leh thawhdan te ngaihthlak a ni a. Eye Bank in eye donation an buaipui dan hrang hrang tarlan a ni bawk. Kum 2008-ah Mizoram Eye bank chu eye bank assn of India inziah luh a ni a. September 25, 2009 ah Mizoram-ah a tum khat nan Mit darthlalang thlak a ni. 

Mi inphalten Mit tha lo te tana mit an pek dawn in an dam laiin an phalna lak a ngaih thu te, chutianga intiamnna an nei lo anih pawhin an thih hnuah pawh an chhungte hnenah dil theih a nih thu tarlan a ni a. Mitthi tawh chu a Mitmu la chhuak lovin Mit darthlalang chauh lak thin a ni. Chhungte tan pawh hmuh hreawm a ni loh thu an sawi. Damlo chu a thih atanga darkar 6-8 hma ngeia mit darthlalang hi lak thin tur a ni a, Mit pek chu mit tha lo tu te pawhin an dawn theih tih an sawi bawk. 

Kum 2008 atanga 2022 thlengin mit darthlalang lak 938 an awm tawh. Mit pe tura intiam 8620 awmin, mit thlak ngai damlo inhriattir 362 an awm a. Mit pe tura intiam mi 474 an thi tawh a, Mihring mit hi mihring mit bakin a thlak theih loh a ni.