Aizawl : Nimin khan Assam Forest Department hnathawktu ten an hal nia sawi John Zolawma huan chu independent MLA pathum, Vanlalhlana, Chhuanthanga leh Andrew H. Thangliana te chuan an tlawh.

He hmuna kal MLA Vanlalhlana chuan MNF sawrkarah ram a him trawh lo niin a sawi. Heng MLA pathum te hin Luimawi khuaah Mamit DC Dr. Lalrozama Chawngthu, nen intawngin, helai hmuna thil thlen dan hi Mamit DC hian a hrilh fiah niin ZPM thuchhuah chuan a tarlang.

ZPM chuan Assam lam hian John Zolawma thlam an hal mai bakah huan thlai an suasam nasa hle, niin an sawi a, Chhawhchhi quintal 2 thar ngei tura rin te, kuhva kung 600 te an suasam zingah hian a tel niin an tarlang.

John Zolawma thlam bula Thinghlun VLTF te Covid duty-na buk pawh Assam lamin an ngaimawh avangin Mamit district authority lam chuan an lo hal tawh niin an sawi a, hei vang hian Assam lam hi an ngampat phah niin an ngai.

John Zolawma thlam leh Thinghlun khaw inkara Mamit District MANEGRA lungphun pawh an tichhe bawk niin an sawi a, Mizoram sorkar hian Assam sorkar thu an hnial ngam lo hle a ni, an ti a, Vanlalhlana, MLA chuan, "MNF sorkarah Mizoram a him lo hle a ni" a ti.

MLA pathum te hian John Zolawma tawrhpuina ? 2,000/- theuh an hlan nghal.