Aizawl: Lunglei North AC bialtu MLA leh Mizoram Youth Commission Chairman ni bawk Dr Vanlaltanpuia chuan nimin khan Lunglei Civil Hospital-ah medical hnathawktute hman tur Covid-19 hrileng laka invenna hmanrua thahnem tak PPE, Glove leh disinfectant a hlan. Lunglei CMO Dr. Thani Pachuau, Medical Superintendent Dr SR Ngurchamliana leh Civil Hospital hnathawktu ten lo dawnsawngin MYC Chairman hi sawrkar official-te leh party hruaitu ten an tawiawm a ni.
Hemi puala hun tawi Civil Hospital Conference Hall-a neihah Dr. Vanlaltanpuia chuan khawvel pum tibuai mektu Covid-19 hripui beih let kawngah Chief Minister Zoramthanga leh H&FW Minister Dr R. Lalthangliana leh ram hruaitu dangte kaihhruaiin sawrkar chuan theihtawpa hma a lak zel thu sawiin Covid-19 avanga hun khirh tak kan tawn mek lai hian sawrkarin a tum ber chu mipui mamawh a rang thei ang bera phuhruk a ni, a ti a. Covid-19 do kawngah Mizoram mipuite kan tangrual tha chu a lawmawm tak zet a ni tiin sawrkar hnathawkte, VLTF-te, NGO, VC leh media-te, phal taka tanpuina thawhtu mimal, pawl, Kohhran bakah mask, PPE leh hand sanitizer siamtu mi thahnemngai tak takte chu chhuanawm a tih thu a sawi. PPE leh hmanraw dangte chu medical hnathawktu ten tangkai taka an hman ngei a beisei thu sawiin an mamawhte sawkarin a ruahman chhunzawm sak zel dawn a ni, a ti bawk.
Mizoram Youth Commission Chairman chuan MYC hmalaknate pawh sawilangin Mizo thalaite fuih thar tur leh kawng kawhhmuh turin MYC chuan kar lehah hian Live Show ‘Thalaite Tukverh’ a buatsaih tur thu a tarlang a. He Live Show hi 6th-9th May, 2020 zan dar 8 ah Zonet leh LPS ah tih chhuah a ni dawn a, Career Guidance neih a nih dawn bakah sports discipline hrang hranga hlawhtlingte, Fashion & Entertainment lama hlawhtlingte an kawm dawn a ni.
Civil Hospital program neih zawh hnu hian MYC Chairman hian Zohnuai Lungleia Digital Planetarium leh Science Center sakna hmun tur a tlawh nghal a. Helai hmunah hian a rang thei ang bera hnathawh tan leh tum anih thu MYC Chairman hian a tarlang bawk.