Aizawl: Serlui bialtu MLA Lalrinsanga Ralte chuan a bial chhung khaw hrang hrang hmun lunlaia hun turin vantlang kut silna tur litre 500 dawng plastic tuizem 18 chu a sem.

Lalrinsanga Ralte chuan, "Serlui bial chu ramri dep a awm a nih avangin tuna hrileng mek Covid-19 lakah hian kan in ven uluk a, kan fimkhur tlan a tul hle a ni," a ti a. He hrileng mekin Mizoram a rawn lut a nih chuan kan bial chhung mipuite hi a tuar hmasa leh tuar nasa ber pawl kan nih dawn avangin mipuite'n sawr-kar thu ngai pawimawh a, zawm tura thuchhuah a neihte chu zawm hram hram turin a ngen.

Serlui bialtu MLA chuan Vairengte-a Scree-ning post a duty te hak tur Surgery gown 70 a leisak bakah vantlang kut silnaa kut sil tur ten an hman atan tuizem zawng zawng bula dah turin dettol sahbawn 1 dozen khat theuh a dah tel bawk a ni.

Plastic tuizem te hi Vairengte ah 5, Bilkhaw-thlir ah 3, Saiphai ah 2, Saipum ah 2, Phainuam ah 2, Phaisen ah 1, Buhchangphai ah 1, Rengtekawn ah 1, Saihapui 'V' ah 1 dah a ni.