Aizawl: Lengteng bialtu MLA leh HRD Board Vice Chairman ni bawk L. Thangmawia chuan nimin khan Sialkal Range Development Council office, Venghluiah a bial chhunga HSSLC leh a chung lam zirlai thiam thei, chhungkaw harsa mi 13 te hnenah tanpuina sum a hlan.

Tanpuina semna hunah hian L. Thangmawia chuan chhungkaw harsa tak atanga lehkha zirchhuak a nih thu sawiin, “Retheihna hi chhuanlam ah hman a rem lova, chona thar min pe tu ah kan hman thiam a pawimawh a ni,” a ti. Thangmawia chuan harsa tak atanga zirlai thiam thei zir chhunzawm duh ngawih ngawihte puih dan awm thei se tih chu hun rei tawh tak atanga a lo vei tawh thu sawiin a mamawh leh a phu zawng zawngte tanpui theih vek ni rih lo mah se zirlai 13-ten tanpuina an dawng chu a lawmpui thu a sawi.

Tanpuina hi Rs.10,000, Rs. 20,000 leh Rs. 25,000 te in sem a ni. Ngopa SDO (Civil) Lalhruaitluangi chuan Lengteng bial chhunga zirlai harsa zual thlan a nih dan sawi- fiahin zirlai harsa zir zawmna tur mamawh tak tak mi 100 thlan chhuah a ni a, ngun taka enfiah a nih hnuah mi 13 hnenah tanpuina hi pek phawt an ni tih a sawi.