September 6, 2023; Kumin 2023 kumtawpa MLA inthlanpui lo awm turah, vawiin thlenga hriat theih chinah hmeichhe candidate 7 an awm dawn. Congress leh ZPM in hmeichhe candidate pahnih ve ve an nei ang.

ZALEN thudawn chinah MNF chuan Aizawl East II a ding turin AMC a Executive Corporator ni lai, B. Lalawmpuii chu an tifel tawh a, campaign pawh a tan tawh, official a puan erawh a la ni lo.

ZPM in Aizawl South III a ding tur AMC Corporator ni lai, Baryl Vanneihsangi leh Lunglei East a ding tur Lalrinpuii official in an puang fel tawh bawk.

Congress party chuan an candidate tur te official in la puang lo mah se, hmeichhe candidate pahnih an nei dawn nia hriat a ni a, pakhat zawk chu minister pawh lo ni tawh Vanlalawmpuii Chawngthu niin, Kolasib bialah a ding ang a, tunhnai a congress zawm Meriam L Hrangchal chu Lunglei South ah dintir a ni dawn nia sawi a ni.

Tuikum bial ah independent a ding tur Chhiahtlang nu, Lalrinmawii (Amawii) awm bawkin, ani hian ngawrh takin campaign a tan tawh nia hriat a ni a, ani bakah hian 'Lalpa Chhiahhlawh Intelkhawm' in candidate tur thenkhat an puan tawh zingah, Aizawl North I a ding tur Lalruatfeli Hlawndo a tel bawk.

Heng mi 7 te hi hriat theih mai chin a hmeichhe candidate ni ngei tura ngaihte an ni a, hmeichhe dang an awm belh tur leh tur loh hriat theih mai a la ni rih lo a, hetihlai hian party lian ho atang chuan tuna tarlan te bak hi hmeichhe candidate dang an awm a rinawm tawh loh.