ZALEN April 15, 2026: BJP Mizoram chuan vawiin 15 hian Nari Shakti Vandan Adhiniyam thlawpna lantir nan Two-Wheeler Rally buatsaihin, Vanapa Hall kawt aṭanga Sikulpuikawn ah kalin, BJP State Office, Mipui Rûn, Upper Republic-ah hun tâwp hman a ni.

Two Wheeler Rally Flag Off neih hma hian Lalremsangi Fanai, State Jt Treasurer & Nari Shakti Vandan Adhiniyam State Convener chuan, "Prime Minister Pu Modi kaihhruai hnuaiah Women's Reservation Bill hman theih tura, sawi ho a ni dawn ta hi a lawmawm hle a, Two-Wheeler Rally-a lo kal te hi BJP an nih vang ni lovin, Women's Reservation Bill tha kan tih vang a ni a, nakin lawkah chuan Mizo hmeichhia MLA tam tak kan la nei dawn a, hmeichhiate hmakhaw ngaitu PM Modi chungah lawmthu kan sawi a ni, India ram President mai bakah Union Finance Minister hmeichhia kan nei a, ram hruaitu nihna pawimawh tak tak hmeichhiate pek an ni zel a ni," a ti.

Two-Wheeler Rally hi Lalduhawma, State Vice President-in a Flag off a, BJP State Office-ah kharna hun hman niin, Lalremsangi Fanai, State Jt Treasurer-in inkhawm a kaihruai a, Dr. K. Beichhua, MLA & State President-in thusawina hun a nei.

Dr. K. Beichhua chuan, "Women's Reservation Bill pass tawh hman theih tura ruahman lawmna leh hriatpuina kawngzawh kan hmeichhe fel tak tak te'n in nei hi kan lawm hle a. PM Modi chuan Women Empowerment hi a ngai pawimawh hle a, hmeichhiate heti tak maia chawikân a duhna hian India ram pum ah a ṭha zawnga nghawng a neih ngei kan ring tlat a, Mizoram ah pawh vawiinah chuan Hmeichhia chhungkaw chawm kan tam tawh hle a, Sa sât thlengin hmeichhia thahnem tak kan awm tawh a ni," a ti.

"Mizoram hma lam hun thui tak hril thei tur Women's Reservation Bill hman theih a nih dawn tak avangin, Mizo hmeichhia ram leh hnam tana hmala duhte chuan tun hma aia nasa zawka inbuatsaih a ngai ta a, MLA Seat tam zawk hmeichhiate tan a nih tawh dawn avangin, Mizo Hmeichhiate aiawha ding thei tur khawpa lo inbuatsaih a pawimawh ta a ni. Chuvangin kan State-ah ngei pawh hmeichhiate'n kan tha kan tih chaka ram rorelna-a tangkai taka thawk thei turin kan inbuatsaih a ngai a ni," a ti bawk.