Aizawl January 18, 2023: MPCC President Lasawta chuan Lunglei district-a MNF MLA te chu dawih zep tak vek tiin thil thaah pawh an huaisen ngam lo a ti a, MLA huaisen pakhat tal chu nei se, hetiang hian Lunglei khawpui chu a awm tawh lo tur a sawi a, Lunglei chu hmel thar hmu tawh tur nia a hriat thu a sawi.

Lalsawta chuan, "Lunglei District-aa MNF MLA te hu dawihzep tak vek an ni a, thil tha ah pawh an huaisen ngam lo, an dawihzep vangin Covid hrilen lai pawhin Thorang bialtu MLA Pu Zodintluanga, CLP Leader-in RT PCR khawl Lunglei leh chhim mipui tan a pek pawh an dah mai mai tawh. MLA huaisen pakhat tal chu nei se, hetiang mai mai hian Lunglei khawpui hi a awm tawh lovang a, hmasawnna hmel thar Lunglei hian a hmu tur a ni," a ti.

Vawiina Lalsawta, President MPCC hova LDCC hruaitute leh party a mi pawimawh President Chamber LDCC Bhawan-ah inkawm hona an nei a. He hunah hian Lalsawta chuan Lunglei-in a mamawh a hmuh leh a hriat te a sawi a, Lunglei a Traffic police indaih lohna avanga mipui leh lirthei nei tuten harsatna an tawh thin chu ngaimawh awm, tiin, Lunglei khawpui thang chho zel leh mihring ke a kal ten harsatna/vanduaina/ chetsualna an tawh lohna turin Traffic Police tih len an ngai tih a sawi.

Sawta chuan Lunglei by-pass road chu Lunglei mipuiin an mamawh zia leh hmalak thuai a tul thu sawiin, "Pu Hawla hovin kan ngaihtuah em em a, 
Lunglei tan a pawimawh tih kan hria a, kan sawrkar laiin bul tanna tur sum pawh kan dah kha a ni a, vawiin thleng a hmalakna engmah hmuh tur a la awm lo hi a lungchhiatthlak hle," tiin, Congress party chuan Lunglei by-pass road a hlawhtlin an duh thu a sawi.

MPCC President chuan Lunglei Greater Water Supply Scheme phase 2 chungchang pawh sawiin, "Lunglei hian in mamawh tak zet tawh a ni tih kan hria a, he thil hi Congress Party chuan kan ngai pawimawh tak zet a, Pathian leh mipui zarah kan sawrkar anih chuan heng thil pahnih Lunglei by-pass Road leh Lunglei Greater water Supply Scheme - phase 2 hi kan hmalak hmasak tur te zinga mi a ni dawn a ni," a ti bawk.