Aizawl: Aizawl West III bialtu MLA VL Zaithanzama chuan a bial chhunga HSLC leh HSSLC result tihchhuah taka top 10 a inziaktling te hnenah Laptop a pe.

MLA VL Zaithan-zama hian Higher Secondary School Leaving Certificate result chhuaka a bial chhung atanga top ten a tling Jessica Ramdinpuii d/o Lalnunfela, Khatla 10th position (Arts) Staine's Memorial School leh H. Lalvensanga s/o Laldinpuii, Khatla East, 7th Position (Science) St. Paul Higher Secondary School te chu Zirtawpni khan an chenna inah kal chilhin lawmpuina laptop a pe a. Fuihna thu sawiin MLA chuan, "Tunlai khawvelah chuan zirna hi a pawimawh em em a, thil engkimah thiamna hi a hlu a, zirna hi ngaih pawimawh deuh deuh a ni a. Chitihrualin, kuthnathawh hi a pawimawh tak zet a ni," a ti a. Zirlai nih lai atanga kuthnathawh zak hauh lova uar tura fuihin, "Kuthnathawh hi a hlu a, a tha a, kan zir zelna turah chhelna leh taimakna min pe a. Mi taima a piang an hlawhtling thin a ni," a ti bawk.

VL Zaithanzama hian kumin High School Leaving Certificate result chhuaka Topper (Arts) Lalhlimpuii d/o C. Vanlalsiama, Khatla veng, St. Paul Higher Secondary School zirlai hnenah laptop a lo hlan tawh bawk a ni.