ZALEN February 8, 2025 : MNF Legislature Party Leader leh Leader of Opposition Lalchhandama Ralte chuan Mizoram sawrkar chuan India rama IAF enkawl Airport te dinhmun thlirin Lengpui Airport a ruahmanna an neih chu ngaihtuah nawn leh se, an hlan a nih chuan ram mipui te pawi an khawih dawn a ni a ti.

Vawiin MNF Legislature Party ten Lengpui Airport an tlawhnaah Lalchhandama Ralte chuan, "AAI leh Adani Group te chu thuhran pawh ni se, kan sawrkar hian IAF kutah hian pe ta se vawiina kan thlawhna thlawh ang hian a thlawk reng thei ang em? Reilote-ah Airport sir leh sirah hian Indo thlawhna thuhrukna tur Blast pens siam a ngai ang a, missile dahna tur te pawh ruahman a ngai ang, indo hmachhawn thei turin Airport hi ruahman a ngai dawn a ni," a ti.

MNF Vice President chuan, "India rama IAF enkawl Airport engemaw zat a awm tih kan hria a, chung ho than dan te, mipuiin harsatna an tawh dan te han hmu a, kan hria a, north east-ah pawh engemaw zat a awm a, chung te han en hian kan sawrkar hian ruahmanna an siam hi MNF Legislature party chang ni lo, MNF party ang te, Mizoram Congress party angte, kan NGO zawng zawng pawhin an duh loh hi tilul lo se. Mizoram rohlu a nih hi, hei hi chu tihral kan phal lo an tih hi Mizoram sawrkar hian ngaihtuah nawn rawh se. Hei hi an tilui anih chuan ram mipuite pawi an la khawih dawn,"

"Vawiin ni-ah Lengpui Airport kan neih chhun hi kawng engkima kan communication line hnukpui a ni a, khawvel dang leh state dang te nen kan inkalpawhna awmchhun a ni. Hei kum khat emaw chauh an kalpui a, an manage tha lo lutuk a, thla thum bak license a nung tawh lo ang tih ngai khawpa a awm pawh hi a zahthlak a, he sawrkar hi inngaihtuah harh rawh se tih hi ka sawi duh a ni," a ti.

Lalchhandama Ralte chuan Chief Minister mual liam tawh Brig. T. Sailo leh Laldenga bakah la dam Lal Thanhawla leh Zoramthanga ten Airport atana theihtawp an lo chhuah tawh a, kum 25 chung zet an enkawl a, tuna sawrkarna fawng chelhtu ZPM-in kum khat awrh chauh a enkawl hman tiha hralh an tum ta mai chu hriatthiam har a tih thu a sawi.

MNF Vice President chuan an sawrkar lai khan tuna runway sirah hian runway dang siam tumin hma an la tih a sawi a, tuna mi ai hian a thui theih zawk tih PWD engineer te pawhin an finfiah thlap a ti. Central lamah pawh DPR thehluh a ni tawh thu leh he runway hi puitlin a nih chuan international airport neih te pawh beisei a nih laia IAF te pek tum a nih chu a hrialhhai thlak a tih thu a sawi bawk.

He hunah hian MNF MLA 10 zinga pasarih te an tel a ni.