Aizawl: Mizoram Liquor Prohibition (MLP) Act, 2019 hnuaiah wine rules peih fel a la ni lo a, hemi avang hian Grape Growers’ Society te siam chhuah grape wine chu inhriatthiam tawnnain hralh chhuah mek a ni.

HS Vanlalfakzuala, Chairman, Champhai Grape Growers’ Society hnen atanga ZALEN thudawn danin, nikum lam atanga an lo dah tawh winery-a grape tui sawr sa te chu an hmunhmain a daih loh avangin hralh chhuah ngei a ngai tawh a, tunah hian hnathawktu ten bottle-ah thunin, Mizoram hmun hrang hrang a vendor-te hnenah an hralh chhuak mek a ni.

“Kan siam chhuah ang ang vendor-te hnenah kan pe a, wine rules-in a la phuar nain, sorkarah hriatthiamna kan ngen a, inhriatthiam tawnnain kan hralh,” HS. Vanlalfakazuala chuan a ti. Champhai Grape Growers’ Society-ten wine an hralh chhuah hi nikum lama an lo siam tawh grape tui dahkhawlna zema dah thatte a ni.

Tun dinhmunah grape tui sawr sa litre nuai 2 tling lo deuh tur winery-ah dah that mek a la awm tih HS. Vanlalfakzuala chuan sawiin, alchohol content siamna an nghei mek thu leh sorkar ah dilna an thlen mek thu a sawi. “Sorkar min ngaihsaknaah kan lawm hle a, tunah hian grape tui sawr sa dah thatna zem lian 10 khawrna tur bungrua a lo thleng tawh a; amaherawhchu, Covid hri leng avangin hnathawktu turte Kolkota atangin an lo la thleng thei lo,” a ti bawk.

Champhai winery atanga grape wine siam chhuahte hi vendor te hnenah bottle khat Rs. 160-in an pe a, bottle chanve um Rs. 80-in an pe chhuak.

Champhai Grape Growers’ Society hian kumin chhungin Champhai leh a chhehvela grape chingtute grape thar chhuah kg-ah Rs 50 zelin, Rs. 57,01,148 man, kg 1,14,021.51 an leisak.