Mizoram sawrkar chuan kum 2014 atanga hman tan 'Mizoram Liqour Prohibition and Control Act, 2014' ennawna a tul anga rawtna siamtu tur Review and Evaluation Committee chu tunhnai khan a din a. Committee ah hian Excise & Narcotics Department Minister chu chairman niin Parliamentary Secretary i/c Excise & Narcotics department chu vice chairman a ni ang a, anni bakah hian official lam atangin member 8 leh non officials atangin member 17, an vaiin member 27 an awm dawn a ni. Sawrkarin Committee member a ruat te hi kil hrang hrang atanga chhutin mithiam leh khawtlang ah pawh parawn tling te, Kohhran hruaitu bakah zu chungchanga hriatna leh thiamna thui tak neite an nih hlawm avangin a ruat fuh hle ti pawhin sawi ila a sual lo ang. An thiamna leh ngaihtuahna mai bakah Committee hunah pawh an ngaihdan te tlang taka sawi thei tur an nih hmel a, Mizoram tana tha ber tur an relchhuah ngei beisei phawt ang. Mizoram Chief Minister in vantlang hmaa a sawi thin ang deuhin Mizote tluka zu buaipui hi hnamdang an awm ve ang em aw tih mai a awl a. Zu in mi te chauhin an buaipui tawk awm lek nia lang hi khawtlang leh kohhran ten kan buaipui luai luai mai chu a ni a, zu hi kan dah hluin kan chawimawi zawk em ni aw tih mai a awl rum rum thin. Khawvel hnam tin hian zu hi an nei theuh a, hnam fingin an siam thianghlim deuh a, hnam mawl deuhin an sawngbawl thianghlim lo deuh ni maiin a lang. Mizoram ah kum 17 chhung zu khapna dan 'Mizoram Liqour Total Prohibition Act' kalpui a ni a, hetih chhunga Mizoram awmdan leh zu khap a hlawhtlin leh hlawhtlin loh te kha a thlirtu 'Tarmit vuah dan' atangin a inanglo viau niin a lang. Thenkhatin hlawhtling an tih viau laiin thenkhat chuan hlawhchham let derah an ngai ve thung a. Engpawhnise sawrkarin ngun taka a ngaihtuah hnuin zu khap burna dan kha a hlawhtling tawkin a hre lo a, zu in duh ten zu tha an hmuh theihnan MLPC Act 2014 hi a duang ta mai niin a lang. Zu hi a tha lam leh chhe lam zawngin sawimawia sawichhiatna tur tam tak a awm a, inhnialna pawh a chawkchhuak tam hle mai. Mizorama Zu khapna dan hmanlai khan dan kengkawhtu leh tlawmngai pawl ten nasa takin bei mahse a duh tan chuan hmuh theiha a awm reng vangin 'zu khap kha a hlawhtlinglo a ni' a tih theih a. A chhan chu a duh tan hmuh tur a awm reng bakah khawpui daifem maiah a zawrhna hmun a awm thleh thluah a. Police leh Excise mai bakah tlawmngai pawl ten tihrem tumin nasa takin bei thin mahse awmzia a awm tak tak thei lo anih kha. Zu khap hunlaia Mizoram thenawm Lailapur (Assam), Zokhawmawi (Myanmar) leh Tripura ramri a zu dawr awm thinte chu tihtawp a ni ta in a la awmchhunte pawh an inhralh ta meuhlo a, hei hian a lantir chian em em chu khang dawr te kha Mizoram mipui te avanga siam an ni a, zu kan neih ve chinah chuan leitu an awm ta lo tih hi a ni. Kawng lehlam atanga thlir chuan Mizoram sum kha thla tin vaibelchhe tel an ei tihna a ni. Engpawhnise kum 17 chhung teh meuh Mizoramah zu khap anih hnu in tunah a mamawhte tan zu in tur tha sawrkarin a chhawpchhuak ve tan chauh a ni a. A thar lawmlai anih bawk avangin zu in chungchangah pawh kan thiamtawk hrihlo hle tih chu a chiang mai a, mahse zawi zawia hmasawn beisei ila. Zu hi a tha lo tih chu tlang hriat a ni chungin a in duh engemaw zat an awm reng avang hian tihrem a harsa a, chuvangin a tha ber kan tlinlo a ni tih hi hreh tak chunga kan pawm ngam a ngai. Chuvangin kum 2 em pawh Zu phalrai a la nih hmaa ennawn tum hi chu a la hma deuh niin a lang a, a chhiat a that hre tur chuan nghah deuh a la ngaih hmel. Engpawh nise sawrkar in zu ennawntu tur Committee a din hian thil tha tak an puakchhuah ngei i beisei phawt teh ang.