Aizawl June 20, 2024: Aizawl Municipal Corporation a sawrkarna chelhtu MNF Legislature Party chuan Aizawl Municipal Corporation-a rorel lai MNF Legislature Party, Aizawl Municipal Corporation (AMC) chuan tunhnaia eptu party pahnih ten an puhmawhna chu thu belhchian dawl lo a ni an ti a, Ward No. 19 Bye-election lo awm turah MNF chu chak ngei dawna an hriat avangin mipuite rilru tihnual thei tura an hmalakna pakhat a ni an ti. A hnuaia mi hi an thuchhuak chu a ni.

Tun hnaiah AMC chungchangah thudik tawk lo thehdarh a ni hi pawi kan ti hle a; a nihna tak hriat loh avangin Aizawl khawpui inrelbawlna atana Constitutional Body tangkai tak AMC hian demna a tawk in, hnawksak ang hiala ngaihna mipui rilruah a tuh thei dawn a ni. Chuvangin, mipui te rilru diklo taka hruaikawi theih thil thehdarh chungchangah thudik puanchhuah a tul ta a ni, an ti.

AMC a eptu pawl ten rorel lai MNF te an puhmawhna te hi thu belhchian dawllo a ni a. Ward No. 19 Bye-Election lo awm turah MNF chu chak ngei dawn a an hriat avanga mipuite rilru tihnual thei tura an hmalakna pakhat a ni tih hi kan hriat a pawimawh khawp mai.

A. HOUSE (BoC) PALZUT NI A SAWI CHUNGCHANG:

“House-ah te thil kan pass a, tihhlawhtlin a awm lova. House zahawmna tihbawrhbanna ah kan ngai a, house ah ward fund te kan han pass a, tun thlengin hmuh kim loh te pawh kan la nei a ni”

Han tih te hi thil hriat loh vang liau liau a ni a, BoC thutlukna hi tihhlawhtlin zel a ni a, sum leh hun a duh avanga tihhlawhtlin nghal mai theih loh pahnih khat chawivawnga sawichhuah a nih hmel. Central atanga sum kan dawn tur State Sawrkarin a tihkhawtlai avanga Ward Fund sem theihloh tlem a zawng tih loh chu Ward Fund hi release vek a ni tawh.

Ward fund chungchang:

Nikum 2023-2024 khan Budget-ah Ward Fund atan Rs. 760 lakh dah a ni a, funding source turin hetiang hian ruahmanna siam a ni.

A chunga tarlan ang khian ULB Grants bikah chuan Central sum release sa hi State Sawrkarin AMC-ah an rawn transfer veleh a, rang thei ang bera sanction nghal \hin a ni a. ULB Grants hi PFMS kal tlanga hmanna pek chhuah a ngaih avangin sum kan dawn loh chu pek chhuah ngawt theih a ni lo. Ward Fund atan hian Party thliar lovin inang tlang vekin MLA Fund ang deuhin inzat veka pek chhuah \hin a ni.

Emergency Response Vehicle lei chungchang opposition Corporator ten House-ah rawtna an rawn siam pawh AMC subject ah Disaster chungchang a tel lo chung hian, a rawttu ngaihpawimawhna avangin pawmpui a ni a. A leina tur sum pawh tun financial year-ah hian dah a ni tawh nghe nghe a ni.

B. PROPERTY TAX HMANNA CHUNGCHANG:

January ni 28, 2016 a AMC Board of Councillors (BoC) meeting chuan Property Tax hi a thawhtu mipuite tan tangkai taka hman let a nih theih nan ruahmanna a siam a, hetiang in:

“Essential Public Utility: Mipui vantlang mamawh pawimawh zual, tui in tur, hriselna, inkalpawhna leh inbiakpawhna, Street light, chhiatrupna thleng thei laka invenna leh a tuarte chhawmdawlna ang chi leh hna pawimawh bik atan sum hmuh zawng zawng za zela sawmriat (80%) tal hman tur a ni.”

BoC meeting thutluknaah hian Corporator kaltlanga Property Tax hi semchhuah tur tih a awm lova, amaherawhchu Party/Ruling induhsak bikna awm lovin Corporator Ward Fund ah sem a ni thin a. Inang tlang veka Corporator ten kan dawn chu kan Ward chhunga Local Council te nen a hmanna tur relin, mipui vantlang tan hman a ni thin a ni.

Local Council-in property tax an khawn atanga 5% hi Local Council ah pek let leh niin a dang 15% hi AMC Administrative Cost atan hman a ni a, a bak zawng 80% hi vantlang hnathawhnan hman thin a ni.

Kum 2023-24 chhunga property tax tlingkhawm Rs. 600 lakh atanga 80% i.e. Rs. 480 lakh hi Mipui vantlang mamawh pawimawh zual thawh nan tangkai taka hman a ni a. Rs. 480 lakh zinga Rs. 285 lakh hi Corporator zawng zawng hnenah Rs. 15 lakh theuhin pek a ni a, a dang Rs. 195 lakh hi AMC office atangin semchhuah thung a ni a. Asset putling tak, AMC Multi-Complex Tuikual South sakna atan Property Tax atangin Rs. 164.5 lakh hman a ni.

Property Tax hi corporator ten mahni duh dan a hmang zo vek mai lovin, engemawzat hi public assets siam nan hman tha kan ti a. Property Tax tlingkhawm atanga Rs. 195 lakh hmanna House in a hriatpui lo anga eptu Corporator ten thu an thehdarh hi thu diklo a ni a, sum hmanna hi revise estimate ah tarlan vek niin BoC in kan passed a ni.

A hmanna kimchang pawh en mai theih a a awm reng laia hetianga hma lak a ni hi a tha lo em em a ni. ‘Eptu lam hian Property Tax mipui thawhkhawm hi in sem zawh vek a, mahni kutzal a khawih leh hmanral hi an la thlahlel viau zawk em ni ang?’

C. CHENG VAIBELCHHE 30 CHUANG DIKLO TAKA HMAN CHUNGCHANG:

Kum 3 kalta chhungin cheng vaibelchhe 30 chuang party induhsaknan sem niin thu thehdarh a ni a. Aizawl khawpui cheina atana kum 3 chhung a vaibelchhe 30 chu kum 1-ah cheng vaibelchhe 10 vel a ni a, Aizawl khawpui chhunga Local Council 85 ah inang tlangin semdarh ta ila, veng khatin cheng nuai 12 vel in an chang thei tawk tihna a ni. Party induhsakna ti a han sawi vak mai hi a dik lem lo a ni. A tlangpuiin hna hi proposal fel tak siamin hman a ni. Local Council chhunga mipuite mamawh hrang hrang lohtheihlohva thawh ngai a awm thin avangin AMC sum zawng zawng hi Assets lian tham siam nana hman vek a rem lo a ni.

AMC Sawrkar sum te hi duh duh a elected tena hman ngawt theih a ni lo a. Official ten uluk tak a an tih fel hnua hman thin a ni. Bungraw lei a nih dawn pawhin Municipal Commissioner kaihhruaina Purchase Committee in an passed phawt a tul thin a ni.

A duh tan chuan AMC sum hmanna te chiang takin document hmuh theihin a awm vek a. Engkim RTI hmanga zawh fiah theih anih laiin, thu dik tawk lo hmang a politics in chirh thehna hi thleng nawn tawh lo se kan duh tak zet a ni.

D. RO TLING THIL SIAM:

AMC chuan a sum neih ang angte tangkai taka hman a, hun lo la awm zel tur atana mipui te tangkaipui theih tur ‘Ro tling - Assets’ siam a duh a. Theihtawpa hma la in hetiang hian mipuite tan Rotling a siam mek a ni. A hnuaiah hian AMC in Assets liantham a siam zawh tawh leh siam mek te tarlan a ni:

Sl No. Name of Works/ Project

1. AMC Multi-Complex, Tuikual South

2. Eco-Park, Zonuam

3. Eco-Park, Ailawng

4. Plastic Waste Management Center

5. Solid Waste Management Center

6. AMC Plaza, Bawngkawn

7. AMC Sports Complex, Bawngkawn

8. AMC City Bus Terminal, Zemabawk

9. Thakthing Market Approach Road

D. DAWR HAWN, INSAK, LEILAIH DIL HUN CHHUNG REI CHUNGCHANG:

AMC thawktute puhmawhna ang zia zanga ‘permit pek chhung a muang’ ti a thehdarh a ni hi AMC tana ngaihtuahna an sen loh zia leh AMC hnathawh kal hmang an hriat loh zia tarlangtu mai a ni a. Building/leilaih permit te hi mipui tan a him em? AMC dan a zawm em tihte uluk taka endik anih hnu a pekchhuah thin a ni a, mipui tan a him leh him loh ngaihtuah lo leh dan zawm mumal lova tawng pawng pekchhuah mai tur a ni lo. Hetianga thu belhchian dawl lo an thehdarh hma hian AMC kalphung leh dinhmunte zir chiangin, thawktute indaihloh zia te pawh hmuhpui pha ve sela chuan hetiang thu hi an thehdarh a rinawm loh hle zawk a ni.

AMC ah hian Officer 9 chiah an awm a, gazetted sanction post 24 lai a ruak a ni. Tin, Enforcement Inspector 3 chiah an awm bawk. Technical sanctioned post atanga 43% chauh hnawhkhat a ni a, chuvangin thawktu indaihlohna hi a nasa hle. Heng post te hi hnawhkhat turin Sawrkarah dilna thlen mek a ni. Tin, State Sawrkarah post siam belh dil mek a ni bawk. Hetih laia thawktute duhkhawp lohna hawi zawng a mipuite fuihpawrh hi a thalo hle a ni.

Heti chung chung hian rang takin phalna pekchhuah a ni thin a, Shop License phei chu document a felfai chuan karkhat chhung tein pekchhuah hman a ni thin.

A hnuaiah hian phalna pek chhuah tawh dan tarlan a ni:

1. Building Permit (In sak phalna) - 13881 (28th June 2018 – till date)

2. SD&SM Permit (Lei laih phalna) - 4233 (30th Dec 2021 - till date)

3. Shop License - 17581 (30th Jan 2014 – till date)

Dil hun chhung rei chhan:

1. Diltuten an chhawr Technical Person (Engineer, Architect, Geologist etc.) (AMC staff ni lo, pawn lam atanga in register) an rawihte hian AMC a dilna an thehluh sak hmain thil tul hrang hrang buaipuinan hun rei tak an hmang thin a. AMC ah dilna lut nghal ah ngaiin hun duh rei anga ngaihna a awm thin.

2. Dilna dawn a nih hnuah pawh documents kim lo/felfai lo avangin thawnlet a ni fo thin.

3. Technical Person zingah Regulation kalh emaw zawm famkim lo emaw a drawing thehlut an tam thin hle a, siamtha turin vawi tam tak thawnlet a ni thin. Chuvangin, exam kaltlang chauha Technical Person te registration ti turin hmalak mek a ni.

4. Rawn siam tha leh tura tih te hi Technical Person thenkhat chuan rawn bawhzui mai lo in an ti khaw muang ve leh thin bawk.

5. Aizawl hmun tam zawk hi hmun him lo, very high hazard zone a ni a. Heng hmun te hian Permit nei thei turin AMC Geologic Review Board kal tlang in, a hmunah uluk taka zirchian phawt ngai a ni.

6. Diltu tam zawk hian inhmakhua lovin phalna nei lovin hnathawh tan dawnah dilna kan thehlut a; fur lai, lei laih khap lai a dilna lut a awm mumal loh in, thal lai ah hian dilna hi a lo lut khawm vak thin a ni.

7. VIP thenkhatin ngaihpawimawh tam tak an rawn thlen thin a, hei hian dilna thenkhat a timuang ve bawk thin.

E. INCINERATOR CHUNGCHANG:

Solid Waste Management Centre, Tuirial a Incinerator hi State Sawrkar ruahmanna leh sum in lei a ni a. Trial Run kalpui mek niin a man pek chhuah loh pawh Rs. 26,07,800/- a la awm a, a thawh dan tur anga a thawh hnuah chauh heng pawisa hi pekchhuah a ni dawn a ni. Tunah hian Incinerator hian a thawh dan tura ngaih a thawk thei rihlo a hriat anih avangin Company lam te siamtha turin hrilh an ni tawh a. Anni lam pawh hian hmalak an tum mek thu lehkha an rawn thawn tawh a ni.

Incinerator Supply turin Tender hmangin M/s Aegis Smart Logix India Pvt. Ltd. Hyderabad thlanchhuah a ni a. Agreement mumal tak ziakin Supply tir a ni. Thlan fel anih hma in Corporator te leh Official ten a hmunah an enfiah thlap a ni. Tunah hian Operator training chhuak an la awm loh avangin a enkawl dan tur leh anih dan tur angin a la kal thei lo a. Pollution Control Board atanga phalna hmuh a la nih loh avangin khawl hi hman theih a la ni lo a ni. Commission theih a nih hnuah training mumal tak kal pui a ni dawn a, chutianga train chhuak ten an enkawl theih hunah chuan tangkai tak leh mumal takin hna a thawk thei turah ngaih a ni.

AMC leh Company aiawhin Trial atana an enchhinna result changchawi a Incinerator hi hna thawk tha theilo anga sawi a ni bawk a. Hei hi enchhinna result mai a ni tih hriat a tha hle bawk a ni.