Aizawl: January ni 23, 2023 Thawhtanni hian Mizo Hnam Runah chhung inkhawm neih a ni. He huna thusawitu MNYF Hqrs. President Dr. L. Thangmawia chuan, MNF chu Pathianin Mizote tan a pek tiin a chawisan zel a rin thu a sawi.

Dr. L. Thangmawia chuan ‘MNF hi kan hnam, kan sakhua leh kan ram a ral loh nana din a ni. He principle hi kan zawm tlat chuan Pathianin min thlahthlam lovang tih ka ring. MNF hi Pathianin Mizote tana a pek a ni a. A hruai pawh a hruai thin. Kan chapo dâwn apiangin min hnuk hniam a. Party thenkhat chu a dintute la dam laiin hmuh leh hriat tur awm lova thi a awm nual a ni. Miten min diriamin, min bei hle mah se Pathianin he hnam tan hian min din tlat avangin min chawisan zel ka ring tlat a ni’ a ti. 

Thangmawia chuan Zalenna suala beitu Hnam Sipaite fakin, anmahniin   hlawkna nei dawn miah lo mah se, he hnam leh thangtharten chan tha an chan theih nan tiin martar huamin ram tan an lo bei tawh a, an hnungzui tur kan ni. Kan mihringpui te tana thawh hi Pathian rawngbawlna a ni tih ka pawm dan a ni a ti.  

Dr.Thangmawia chuan Zoramthanga kaihruai Sawrkar chu huapzo sawrkar a ni tih sawiin, "Congress sawrkar hmasak hun laia Land Use policy te kha opposition bial tan chuan beisei ngam a ni lova. MNF sawrkar chuan ruling leh opposition bialah SEDP dawngtu tur inzat theuhin a ruahman mai a ni. Opposition bial pahnih - Tlabung leh Kawrtethawvengah RD block hawn thar a ni ta hian MNF sawrkar Pu Zoramthanga kaihruai hian hmasawnna hnathawh kawngah thliarbik nei loin a thawk thin tih a tilang a ni," a ti. 

MNYF President chuan tun atanga rei loteah chuan Mizoramin kawngpui kan nei tha tawh dawn a. Mi tam takin central scheme a ni chuti khati an ti thin. Central scheme a ni emaw ni lo emaw State sawrkar inrawlh lo leh che lovin hna a kal thei lo tih a sawi. CM Pu Zoramthanga hmalakna Aizawl khawpui helna tur Aizawl By Pass chu nghahhlelhawm a tih thu sawiin, Aizawl by pass road puitlin hunah Aizawl traffic jam hi 40% in a tihniam dawn nia a chhut thu a sawi.