Aizawl July 26, 2022 : Nikum 26.7.2021-a Assam leh Mizoram ramri-a buaina a chhuah avanga inkahna thlen champha a ni a. Kha thil thlengah khan Assam Police 7 laiin nunna an chan. MNF Party chuan, he ni lo thleng hi ram leh hnam tana kan ngaihtuahna kan hman tharna ni leh kan inhlan thar niah hmang ila kan duh tak zet, an ti.

MNF thuchhuak chuan, Mizoram ramri humhalh tur hian ramri-ah hmasawnna hna thawh a pawimawh tiin, theih tawpin hma a la mek an ti a, Mizoram ramri hmun hrang hrangah a theih ang angin hmasawnna hna kalpui mek zel a ni, an ti.

MNF chuan, "Ramri chinfel hna thawk tur hian Mizoram sorkar chuan Deputy Chief Minister Pu Tawnluia Chairman-na hnuaiah Boundary Committee a din a. He Committee-ah hian Mizoram Tlawmngai pawl hrang hrang leh Party zawng zawngte member an ni. He Committee hian thutkhawm vawi engemaw zat nei tawhin Mizoram ramri atana BEFR 1875 ramri chu an pawm a ni. Assam nena kan ramri chingfel tur hian chak angin Mizoram sorkar chuan hma a la chhunzawm zel a. Assam sorkar nen pawh level hrang hrangah inbiakna kalpui a lo tawh a. Tunah hian inbiakna nei turin hmalak leh mek a ni," an ti.

Ramri buai chungchangah MNF chuan, July 7, 2022 khan Assam Border Minister Atul Bora chuan Mizoram Home Minister Lalchamliana a rawn bia, an ti a, ramri chungchangah inbiak an duh thu a rawn sawi niin an thuchhuakah an tarlang. "Mizoram Chief Minister Zoramthanga pawh hmaichhanah ngei ramri chungchang sawipui a duh thu Assam Minister Atul Bora hian Mizoram Home Minister hi a hrilh a, Home Minister Lalchamliana chuan rawtna rawn siam tura lo chhangletin, Assam lam thu leh hla hi la ngaihchan zui mek a ni," an ti.