ZALEN Feb 10, 2025; MNF vice president Dr. R Lalthangliana'n ZPM sawrkarah hmasawnna hna thar thawh a la awm mumal lo tih sawiin, VC leh LC inthlanna lo awm turah ZPM sawrkar laka democracy humhim tura huaisen taka vote thlak turin Zoram mipuite a ngen.

Vawiin (10.2.25) chawhnu dar 1 khan Aizawl press club-ah thuthar thehdarhtute kawmin, ZPM sawrkar hnuaiah sum leng vak a tlem tih chu tunlaia Zoram pum titi ber a ni mek tih sawiin, Dr. Thangtea chuan, sawrkar hnathawkte thla bi hlawh tur pawh puk chawp zela pek ngai a nih avangin Mizoram sawrkar atangin hmasawnna hnathawhna tur beisei tur a awm lo niin a sawi.

"VC leh LC te tan hian finance commission rawtna angin central sawrkarin khel loin hmasawnna hnathawhna tur sum a pe chho mek a. Kum 2025-26 -ah pawh VC te tan Rural Local Body Grant Rs. Vbc. 74 ruahman a ni a, khawpui a hman tur Urban Local Body Grant pawh Rs. Vbc. 40 ruahman sa a ni. Heng sum te hi Mizoram sawrkarin a hrek theih hauh loh a ni," Dr. Thangtea chuan a ti bawk.

MNF sawrkar kalta leh tuma kan LC/VC ni mek ten ram leh khawtlang tan theihtawp chhuaha hna an thawhna-ah fel tawk lo leh fuh tawk lo engemawzah an nei ang tih sawi bawkin, Dr. Thangtea chuan, mipuite hriatthiamna a dil a, tha zawk leh chak zawka hnathawk thei turin, Zoram mipuite an candidate te chhinchhiahna ARSI a vote thlak vek turin a sawm.