Aizawl August 10, 2022 : MNF chuan Independent MLA, Dr.Vanlalthlana'n August ni 8, 2022-ah ZPM office-ah Mizoram sorkarin covid do nan sum seng tlem lutuk anga a puangzar kha dawt hmanga mipui hruaikawi tumna hmanruaah a ngai, an ti. Chanchinbu thenkhatah phei chuan covid do nan Dr.Vanlalthlana thusawi hi la chhawngin state budget atanga cheng khat pawh hmang lo anga chhuah a ni hial kha MNF chuan pawi a tiin hriatthiam harsa a ti takzet tih an thuchhuak siamah an tarlang.

Hripui leng do nan hian kum 2020- 2021 inkarah khan .30% state budget atanga sen a ni a, hei hi cheng vbc 30 chuang lai a ni. Kum 2021-2022 inkarah .64% covid do nan hman a ni a, chu chu cheng vbc 70 chuang lai a ni bawk.

Covid-in nasa takin min nuai a, khaw chhak lamah lir a nghing reng a,  chhim lamah ram a kang a, ramri a buai a, khawchhak lam unau raltlante lo dawn sawn a ngai a. Budget a dah lawk miah loh sum tam tak senral a ngai a, heti chunga Treasury khar lova vawiin thlenga kan la awm thei hi Chief Minister Zoramthanga  kaihhruai sawrkar hi financial management-ah a thiam hleah MNF chuan an ngai, tih an tarlang

Hripui leng avangin Mizoram sawrkar pawhin central atanga a sum hmuh tur cheng vbc 2000 chuang lai a hmu lo a, sum leh paiah kan tawh lai pawhin sorkar hnathawk hlawh la lo pawh an awm lo leh mipui mamawh zualpui nghei lova vawiin thlenga a kal thei chu sum leh pai enkawl kawngah Chief Minister, Finance Minister ni bawk Zoramthanga remhriatna leh thawhrimzia lannaah MNF chuan a ngai, an ti. 

State budget piah lamah covid do nan Health Minister, Dr.R.Lalthangliana'n ICMR, Government of India atang te, foreign atang te, donation hrang hrang a sawi chhuak thei chu ropui an tih thu leh an chhuan thu an tarlang bawk

Eptu MLA-te leh Independent MLA thenkhat te chu thudik tawk lo hmanga mipui rilru hruaikawi tumah MNF chuan an puh a, sim turin an ngen bawk.