Aizawl: MNF Party chuan Congress party chu sawrkar, kohhran, tlawmngai pawl leh mipuiin hripui lungrual taka an donaah Rotekawla sepa anga awm lova, lo tel ve turin an sawm.

Nimina thuchhuah an siamah MNF chuan MPCC Media Cell in Mizoram State Sports Council-in hna an pek chungchang press mite hnena an sawi chu thudik ziktluaklo a nih dan sawrkar press release ah sawifiah a ni chunga work order-te an la hal zui zel duh ram hmangaih loh thlak hleah an ngai tih an sawi a. Congress te thiltih chu ram hmasawnna dona, intodelh tura sawrkar hmalak mekna dona ah an ngai tih sawiin hripui leng nasa tak karah pawh sawrkarin kutsuiha indawmkun mai lova intodelh tur leh hmasawn tura a bei hram hram chu ropui an ti tak zet tih an sawi.

MNF thuchhuah chuan hripui chung-changah hriat lawk loh leh inbuatsaihna hun awm loah sawrkarin sum leh tha a seng nasa hle a. Heti chunga CM Zoramthanga kaihhruai sawrkarin intodelhna tur leh hmasawnna lam hawia ke a la penpui hram hram thei chu lawmawm an ti a. 'Hripui karah ei leh bar hnianghnar taka kan nei thei te, kawngtha kan nei chho zel thei te, thingtlang mite tana ni za inhlawhna tam zawk siam sak an ni zel thei te, lei let thei lote leileh sak an ni mek te leh hmasawnna lamtluang kan zawh zel theite hi MNF chuan lawmawm a ti a. Chief Minister Zoramthanga, Minister-te leh sawrkara mawhphurhna latute inpekna leh hnathawhte hi MNF chuan hmuhnawm kan tiin kan chhuang tak zet a ni,' an ti.

Hripui chu Congress party in hamthatna lak tumin politics chaw tha atan an hmang ngar ngar nia sawiin, “Zoram mipui kan phek buai tirh atanga vawiin thleng hian Politics-a hlawkna an neih theihna tur zawng hlirin thu leh hla an nei a. Party dang zawng MLA-in an hlawh leh MLA fund lungrual taka Covid 19 dona atan CM relief fund-a an chhun laiin ngiaunger an chhuah a. He hri avang hian sawrkar kal mumal lo se, mualpho se tih hi an duh ber a ni a. He an duh leh an tum hi Pathian leh mipui zarah MNF chuan a thlen a phal ngai lovang,” an ti bawk.