Aizawl: Zoram Peoples Movement Thalai President Dr. C.Lalrammawia chuan, "MNF Party hian hripui hi inphen nan an hmang a, SEDP hi nuam tawl nan an hmang thung a ni," a ti.

ZPM Tawi West Block ten nimin Seling YMA Rûn-a Block Annual Meeting an neih a hmanpuina ah he thu hi sawiin Dr.C Lalrammawia chuan MNF ten mipui hnena SEDP Rs. 25,000 an sem chu SEDP chhe mi a ni tih sawiin, SEDP Board Executive Board pawh an ṭhut hma hauhin an duhsak zawngte leh a lai lum kil phate chuan SEDP chu a nuai bi-a an lo dawn daih tawh thu a sawi a. "Mipuiah SEDP an sem hmain an duhsak zawngte hnenah SEDP cheng nuai 3800 chuang an sem ral hman"a ni," a ti. 

ZPM member zingah SEDP dawng tura thlante an lo awm a nih pawhin inthlahrung lova dawng a, ṭangkai taka hmang tura chahin, "MNF sum ni lovin mipui sum in dawng a, mahse MNF vote let erawh in ba lo a ni," a ti. Dr.C Lalrammawia chuan MNF-in an SEDP sem an tlakpui ngei dawn thu sawiin, mipuite'n hmasawnna tluantling chhawp chhuak thei sawrkâr an duh tawh zawk thu a sawi a, "MNF leh Congress a ram siam ṭhat duhtute ZPM ah an lut zel a ni," a ti bawk.