Aizawl : Mizo National Youth Front (MNYF) te chuan thuchhuah siamin inthlan neih thuai chu kan ram ram dinhmun nena thlirin mipui tan leh khawtlang rorelna kawngah inthlan thuai chu tha zawk turah an ngaih thu an tarlang a, mipui te chu fimkhur turin an chah bawk.

MNF thalai chuan, "Kan hma lawkah Local Council/Village Council inthlan a awm leh dawn ta. Zoramin hripui avanga hun harsa tak kan tawh mek lai a ni a, khawtlanga rorelna tha leh fel tak a awm vat theih hi mipui tana a that zawk avangin, hun rei tak inthlan lo sawn hlat tawh chu eptu lamten sawn hlat leh phut mah se, sawn hlat leh chi ni tawh lovin a lang a, voters zawng zawngte chu hripui pu darhtu emaw, kai chhawngtu emaw ni lo turin theih-tawpa fimkhur turin MNF Thalai chuan kan duh a; mitinte him nan sorkarin theihtawp chhuah ve bawk mah se, mahni himna hi mahni kutah a innghat lian ber a ni tih i hre thar ang u," tiin an thuchhuah-ah hian an tarlang.

Opposition party-te chu politics inbeihna tha lo tak tak kalpuiah puhin, hripui leng pawh politics-a inbeihna remchanga hmang duh khawp nia an ngaih thu an sawi a, hei vang hian thlan chi pawh niin an ngai loh thu leh Congress party chu inthlan hrim hrim sual thlah zalenna atana hmang thinah an puh.

Congress chu khawtlang hmangaih lo leh inthlan zuam ve hrim hrimah chhuahin, ZPM chu mahni chhungkua pawh enkawl fel hlei thei lovah an puh bawk a, an party chu mahni thusawia ding nghet leh principal kalpui thin awmchhunah an inchhuah ve thung.