Aizawl May 31, 2023 : Mizoram sawrkarin RTI zawhna a chhanna atangin Zokhawsâng-a Assam Rifles-te an insawn luhna tura Mizoram sawrkarin a tih tur ang ang a tih zawk vek tawh tih târlan a nih laia tun thleng an la insawn lut loh chu ZPM Thalai chuan an hriatthiam loh thu leh MNF sawrkar chu Assam Rifles sawnchhuah chungchang politics khelhna atan chauha hmangah an puh.

ZPM Thalai chuan thuchhuah siamin, "LMC inthlan dawna Land Revenue & Settlement Minister Pu Lalruatkima'n Assam Rifles-te chu a battalion pum huapa an Atta nuaina leh kelsa kanna bêl nen lama Zokhawsânga insuan angin mipui hmaa a sawi a, vawiin thlenga Zokhawsâng-a an la insawn lut lo hi ZPM Thalai chuan a hrethiam lova. Aizawl khawpui atanga Assam Rifles sawn chhuah hi MNF sawrkâr hian politics khelhna atân chauh em ni a hman? tih hi kan zawhna a ni," an ti.

ZPM Thalai chuan Mizoram sawrkârin Zokhawsâng Assam Rifles Complex-a a hnathawh chu a chhiat thu Assam Rifles lam atang an dawng niin an sawi. "Hengte hi Mizoram sawrkârin sawifiah se, building luah tlâk lohte pawh a awm tak tak em? tih sawifiah ngei turin MNF sawrkar kan phut," an ti.

MNF Minister leh party hruaitu hraw tak takin LMC inthlan laia Assam Rifles-te Zokhawsâng-a insawn lut tawh anga an sawi hi mipuite zah lohna lian takah ZPM Thalai chuan an ngaih thu an sawi a, MNF chu politics-ah pawisak an neih lohzia tilang chiangtu-ah an ngai thu leh MNF party hian an tlin duh luatah dawt politics an hmatheh hreh lo a ni tih lo hre lawk turin mipuite a chah a ni.