Aizawl May 25, 2023 : MNF Gen. Hqrs General Secretary VL Krosshnehzova chuan, MNF Mizo hnam tana din, a inanghahna chu ‘Pathian leh kan ram tan’ tih a ni. MNF chu din a nih atanga vawiin thleng hian Zofate insuihkhawm lehna atan leh rorelna pakhat hnuaia Zofate an awm theihna tura beitu a ni. Tun sawrkar term-ah pawh MNF hian hei hi ngai pawimawh tih hai rual a ni lo, a ti. Raltlante lo dawn sawn danah Mizo mipuite chungah lawmthu a sawi.

Nimina thuthar lakhawmtute an kawm naah VL Krosshnehzova chuan, "Myanmar, Bangladesh leh Manipura Zofate chuan harsatna hrang hrang an tawk a, Mizoramah an rawn raltlan. Kan unau raltlante kan lo dawnsawn leh enkawl danah MNF chuan lawmawm kan ti a. Sawrkar-in dawnsawnga a tuamhlawm dan te, YMA, MZP, tlawmngai pawl, Kohhran leh Political Party ten kan theihna zawn theuhah theih tawp chhuahin kan lo buaipui a. Mizoram state-in hmun danga kan unaute tana theihtawp a chhuah hi MNF chuan ropui a ti a, nationalism-in hma a sawn zel avangin MNF party a lawm a ni," a ti. 

MNF GS chuan, Kum 2022 tir lam atangin Mizoram-ah Myanmar atangin kan unaute an rawn raltlan a. India sorkar chuan thawn let leh turin Mizoram sawrkar instruction a rawn pe a. Chief Minister Zoramthanga chuan, “Kan unaute an ni a, hetiang dinhmuna an awm laia an nunna humhim tura rawn tlanlutte hi kan hnawt kir thei lo. A theih ang angin kan lo tuamhlawm dawn,” a ti a. Theih tawp chhuahin sawrkar leh mipuiin a tuamhlawm ta chu MNF chuan lawmawm an ti. 

Bangladesh lam atanga raltlante India ramri vengtu Sipaite’n nasa takin an lo dang chunga an luh theihna tur kawng zawn a nih sawiin. "Chief Minister Pu Zoramthanga chuan, 'Kan unaute danbeh hi rem kan ti lo. Nangni pawh in chipui Bengali ho Bangladesh atanga India-a an rawn raltlanin in lo hum tho alawm,' tiin, a tang khawng tlat a ni," a ti. 

MNF chuan May thla tir atangin Manipur buaina a intan atanga Mizoram mi tangkhangte lakchhuah kawnga Mizoram sawrkar hmalakna chhuanawm an ti a, sum leh pai engemaw zat sen ral a ni, an ti. Manipur-a Zofa chi peng hrang hrang buaina tawkte Mizoram sorkar-in a buaipuina pawh lawmawm an ti bawk.

Mizoram sawrkar chuan special-in buhfai quintal 1840 (as on 19.05.2023) Manipurah a thawn tawh a. Hei bakah hian Manipur atanga raltlan Mizoram hmun hrang hranga awmte ei turin buhfai quintal 2156 (as on 19.05.2023) sawrkar-in a sem tawh bawk a ni.

Manipur-a Mizoram mi tangkhangte thiarchhuah hna Mizoram sawrkarin theihtawp chhuah a, Chief Minister Zoramthanga pawh Manipur-a thlawh chhoh tumin a inbuatsaih hman niin an sawi bawk.