Aizawl July 9, 2024 : MNF chuan nimin khan thuthar thehdarhtu te an kawm a, June 28, 2024 Remna Ni lawmna MZP-in a buatsaih-ah Mizoram CM Lalduhoma chu thu sawi tura sawm a ni a. Chutah chuan thu dik lo engemaw zat a sawi a ni, an ti.

MNF chuan, "Pu Lalduhoma hian, 'India sawrkar ruahmannain Ni 15. 8.1975 khan Pu Laldenga te chu Pakistan atangin ruk chhuah an ni a, Geneva-ah an kal,' tiin a sawi a. "Pu Laldenga staff te leh India Sawrkar aiawhte hi foreign-ah vawi tam tak a hma hian an inbe tawh a, Chumi kal zelah chuan India Sawrkarin Pu Laldenga ngei hi biak an duh ve tawh avangin August ni 15, 1975 ah Pu Laldenga, Pi Lalbiakdiki leh Pu Zoramthanga te chuan Karachi atangin Beirut, Istanbul kal tlangin Geneva an thleng a, India Sawrkar nen chuan an inbe ta a ni. Engti kawng mahin ruk chhuah an ni lo," an ti.

MNF chuan, "Pu Lalduhoma hian 'Chumi zul zui chuan India Sawrkar leh MNF ten Remna Thuthlung hmasa zawk an sign ta a. 1976 July ni 1 ah Shillong-ah an sign a. Hei hi Shillong Accord kan tih thin kha a ni. Hetih lai hian kan Chief Minister Pu CH. Chhunga nen Shillongah kan awm ve reng a ni,' tiin a sawi leh a. Hei hi dawt chiang tak a ni a. MNF leh India Sawrkar hian eng lai mahin Shillong Accord hi Shillong-ah an sign lo. (Naga ho erawh kha chuan Shillong Accord awmze nei zui ta lo kha vawi khat chu an sign). 'Chutih lai chuan Chief Minister Pu Ch Chhunga nen Shillongah kan awm ve reng a ni' a han tih phei hi chu dawt chiang leh zual a ni. July 1, 1976 ah India Sawrkar leh MNF te chuan inbiakna chhunzawm zelna tura tihtur tulte sawiin Joint Press Statement Delhi-ah an siam a ni. Engtik lai mahin India Sawrkar leh MNF te hian Shillong-ah inremna an siam lo hrim hrim a. Chutianga thil awm hauh lo ni si 'chutih lai chuan Pu CH Chhunga nen Shillongah kan awm ve reng a ni,' a han ti te hi chu dawt chiang tak mai a ni tih, mitinin i hre vek ang u," a ti bawk.

"Pu Lalduhoma hian Remna thuthlung ziah a nih chungchang leh remna kawng India leh MNF in a zawh lai chanchinah hian thu leh hla engemaw zat a puangzar tawh a, a pawl awmna a sawn apiangin a thusawi a dang zel tih theih deuh thawin thu a ngah a. A engber nge rin tur hriat har tak tak anni hlawm," an ti zui bawk.