July 25, 2022; MNF President Zoramthanga'n kum 2023, Mizoram Legislative Assembly inthlanpui neih tur ah, Serchhip Assembly Constituency-a MNF Party atanga ding turin J. Malsawmzuala Vanchhawng lungrual takin an thlang tih vawiin khan a puang a, amah pawh a bial ngai Aizawl East I ah a din nawn tur thu a sawi. 

Serchhip Auditorium-ah MNF Serchhip East Block huaihawt Public Meeting-ah hun a hmanpuina ah CM Zoramthanga chuan, tun ang boruaka an kal zel chuan ZPM in seat 10 an lak phak a rin loh thu sawiin, an seat neih mek pawh an hum ange'm tih ngaihtuah tham a nih thu a sawi
    
"Congress chu Delhi chakna eng hmang an ni a, khulamah a burpui a tlu a, helamah a phita a rawp ral zel mai a ni. An lenna ber thin Hmarchhakah an phita a rawp ral zel a ni tih hretu te vek kan nih hi," a ti bawk. 

Pathian leh mipui zarah nakkumah MNF hian seat 30 lak tlin ngei an tum thu sawiin, Zoramthanga chuan, ama tan bial dang en a tul lo a, East I-ah nghet takin a awm mek tih a sawi.

MNF party atanga Serchhip bial a ding tur a puan, J. Malsawmzuala Vanchhawng pawhin thu sawiin, nakum 2023-ah MNF party hian tualto party zingah elpui tham a nei dawn lo tih a sawi a, Mizoramah tualto party pahnih lian a awm theih loh thu leh National party pawh Mizoramah a lian pahnih a awm rual theih loh thu a sawi, "Bial chhung mi ka nihna zawnah theihtawp chhuah ka inhuam a, in fuihna leh zilhna te, in thurawnte pawh ka dawng thei reng a ni," a ti bawk.