Aizawl: MNF thalai chuan ZPM hruaitu pakhatin party thangduang ber an ni anga a sawi chu mak an tih thu an sawi.

Nimina thuchhuah an siamah MNF thalai chuan September 9, 2020 khan Darlawn khuaah ZPM hruaitu Lalduhoma chuan, “ZPM hi party thangduang ber a ni,” a ti chu mak an ti hle tih sawiin kum 2018 MLA Election neih zawh takah khan ZPM hian MLA pasarih lai an nei a, chumi hnu kum 2019-a MP inthlanah khan party thenkhat nen tanghovin vote pawh 43% chuang lai an hmu a. Amaherawhchu, chumi hnu chuan an tlachhe zui ta hle a ni ngei ang, tun Village Council inthlanah khan Mizoramah Village Council - 558 awmah Village Council - 38 chauh an la ta a. Chu chauh ni lovin, Aizawl khawpuia Local Council awm 83 thlannaah Local Council 2 chauh an la a, an ‘Arte lukawn’ lo chauh a ni ta mai a. Chumi bakah, ZPM atangin ZNP party thar peng chhuakin office hran meuh siamin an keh hrang leh ta a.

Heti chunga ZPM thlipui a tleh ang leh ZPM chu party thangduang ber anga an la sawi tlat mai hi an lungawina number a tlem hrim hrim nge, an beisei chin a sang tawh lo hrim hrim zawk kan hre lo va. Hetianga a hnufum zawnga kal sia an la inhmu lian hi MNF Thalai chuan an lainatawm hleah kan ngai a ni, an ti.