ZALEN March 5, 2025 : Mizo Hnam Runah vawiin khan MNF Office Bearer Meeting neih a ni a, VC/LC Election 2025 neih zawh tak thlirletna leh Party hmalak zel dan tur hrang hrangte rel a ni. Resolution paruk an pass zingah sawrkarin Excise & Narcotics Dept kaltlanga ualau lei theih tura Zu dawr a siam tur hi tha an tih loh thu a tel.

Meeting-a kal khawmte hian a hnuaia tarlan ang hian Resolution an pass.

1. Assembly Budget Session 2025-2026 neih meka MNF MLA-te chet dan kan chhuangin an inbuatsaihna a ṭha kan ti a. Ram leh hnam tana ṭha tur huai taka an dinpui ngam ṭhin leh sawrkar kal sual tur an venna kawnga an chet dan a chhuanawm kan ti.

2. Assembly Session neih meka Chief Minister, House Leader ni bawk rorelna hmuna a khawsak dan chu ram hotupa ber tiha tan mawi lo tam tak a awm thin hi pawi kan ti tak zet a. House a chhang let tur awm ve lo, Hruaitu hmasa te sawisel ṭhanhnan a, mite ṭhatna reng reng hmu thei lo leh hmu thiam lo CM kan nei hi a pawi kan tiin vanduaithlak kan ti tak zet a ni.

3. Kohhran leh Tlawmngaipawl te duh loh, khawtlang leh chhungkua tam tak ti chhe tu anih avanga, Zu khap burna Dan (The Mizoram Liquor (Prohibition) Act, 2019) kan neih mek chu siam danglam a, Zu thlah zalenna hmahruai atan Wine leh Beer thlah zalen alo ni tur hi pawi kan ti tak zet a, Sawrkarin Excise & Narcotics Dept kaltlanga ualau taka mi thenkhat te lei theih tura Zu dawr a siam tur hi tha kan ti lo.

4. Village Council leh Local Council inthlan kan neih zawh taka MNF-in seat ṭhahnem tak kan la thei chu lawmawm kan ti a. Opposition party ni chunga LC/VC inthlan kan hmachhawna kan result chu lawmawm kan ti a, MNF candidate te ring tawka thlangtlingtu zoram mipuite chungah lawmthu kan sawi tak meuh a ni. MNF VC/LC zawng zawngte pawh kan mawhphurhna thahnem ngai taka hlenchhuak tur in kan beisei ani.

5. ZPM sawrkar hian an intiamna tihhlawhtlin loh an ngah em em a. Mipui beisei an pha lo hi pawi kan ti. Chutih lai chuan loneitute hnena an intiamna erawh hi chu tihlawhtling ngei ngei turin MNF chuan a phut a. Phatmarna leh chhuanlam dawrawm te te siam kual siam kual lo hian, kuthnathawktute thar chhuah Sawhthing, Hmarcha, Hmunphiah leh Aieng te hi a bo a bang awm lovin lei vek rawh se.  

6. Kan ram rohlu Lengpui Airport IAF kuta hlan hi MNF chuan engti zawng mahin rem a ti dawn lova. Sawrkar hian NGO zawng zawng leh Party hrang hrangte duh dan kalha hlan luih a tum a nih chuan a tawp thlengin a do dawn a ni.