Aizawl: Mizoram Pradesh Congress Committtee (MPCC) chuan tunlai Mizoram hmun hrang hranga kawng chhia chu MNF sawrkar inthlahdah vangah an ngai tih an sawi.

Nimina thuchhuah an siamah Congress chuan tunlai hian Mizoram hmun hrang hrangah kawngpui chhe lutuk avangin harsatna hrang hrang mipuite’n an tawk nasa hle a, hmun thenkhatah chuan mipuiten kawngpui an dang hial tih an sawi a. Congress sawrkar liamtaah khan ruahsur nasat vangin kawngpui a chhe nasa hle a, kawng siamna hnathawhna hun (working days) a tlem a, duh angin sawrkarin kawngpui an siam theih loh vang niin an sawi.

MPCC chuan hetiang taka ruahtui a tam avang khan kawngpui siamna tura Congress sawrkar sum dah sa, cheng nuai 8595.19  pawh hmanna hun a awm mumal ta lova, MNF sawrkar lo piang khan a rawn hmang ta char char a. Congress sum dah sa an rochun bakah khua a tuihul tha em em a, ruahtui tlak nasat avanga Congress sawrkarin harsatna a tawh ang kha MNF sawrkar hian a tawk ve lo a. Heti ani chunga Mizoram hmun hrang hrangah kawng chhiat vanga sumo service tih tawp thawm lo awm ta hi MNF sawrkar inthlahdah vang liau liau a ni a. Assembly House-ah Mizoram kawngpui that avanga lawmthu sawina resolution an pass hial tawh avangin, kawng chhiate hi siam tha vat vat se la, heti chunga kawngpui an siam tha thei lo a nih chuan zahna chang hre turin Congress party chuan kan chah a ni, an ti.