Aizawl May 27, 2023 : Zofate Inkhawmpui Lian, ZORO huaihawta vawiina Vanapa Hall-a neih chu Rajya Sabha MP K. Vanlavena, MNF NCC member ni bawk chuan khuallian niin a hmanpui. K. Vena chuan, "MNF khan independent a sual a ni mai lo a, Zofate rorelna pakhat hnuaia min hruailuh a tum a ni. Kan chhehvela hmundangte pawh a bei thin. MNF-in a tum chu India nena inremna a lo awm tak avangin, Zofate insuihkhawm duhtu ZORO movement a lo lian ta a ni," a ti. 

K. Vena chuan, "Zofate min funkim theiber pawl, ZORO a lo awm hi a lawmawm takzet a. A hmalakna a chhuanawm em em a ni. Inpumkhat dawn chuan buaina leh harsatna kan tawh a tul ve a. Chu chuan inhmangaihna leh inremna, tawng inhriat tawnna a thlen thin. Buaina avangin Zofate kan inhnaih sawt thin a, min ti pumkhat thin a ni. Kan inhmangaih tawn phawt chuan min awp mektute hian kan inpumkhatna leh rorelna pakhata kan awmna tur hi min dal hauhlo ang. Hei hi khawvel history ah pawh a chiang em em a ni," a ti. 

Rajya Sabha MP chuan, "Kan pipute kha hnam mawl leh un-civillized atanga lo chhuak an ni lo a, civilisation-a lo awm tawh ngei an ni tih, darkhuang leh kan thiam thil te atangin a chiang a ni. Thlang an lo tlakin an khawl an kenglo mai a ni. Zofate hi kan chenna a lo hran tak avangin tawng a lo danglam ta a. Tawng thuhmun loh avangin thlahkhat kan nihna a bo lo a, hnam dang kan ni hek lo. Kan lungrualna tur leh kan inzawmkhawm theihna tur anih phawt chuan hnam hming chu engpawh nise a pawilo. Hnam hming leh hming te pawh thlak a ni fo. Zofate hi hmun hrang hrangah awm mah ila, Kristian kan ni deuh vek mai a. Hei hian pumkhat kan nihna a tilang a, kan hnam hi Pathian thutak avangin nuaibo theih a nilo a ni," a ti.