ZALEN April 25, 2025 : MPCC chuan vawiin khan Congress Bhavan Golden Hall-ah Political an hmang a, he huna thusawitu MPCC Spokesperson Dr. Lallianchhunga chuan MNF leh ZPM te chu BJP an thawhpui danah tun thleng hian phatna an la siam lo nia a hriat thu a sawi a, damlo tam takin Kalphungthar health care avangin harsatna an tawk mek a ti.

Dr. Lallianchhunga chuan, "Congress party kan sawrkar lohna tura Mizorama tualto party 2 ten BJP an thawhpui dan a lang chhuak zel a. Hei hi MNF leh ZPM te hian tun thlengin phatna an la siam lo niin ka hria. MNF sawrkar hunlai, Nov 30, 2020 khan BJP National Spokesperson Pu M. Kikon an Aizawl Press Club-ah ‘MNF te hi BJP vanga chak an ni’ tiin a puang a. Kum 2023 a an tlak thleng khan MNF ten M.Kikon-a thusawi kha an an chhang let lo va."

"Tun hnaiah MNF President in BJP Pachal Amit Shah nen an inkawmna chungchang April 7, 2025 khan Hnam Run-ah a sawi a. BJP in kum 2023-ah MNF an puih tawh loh chhan te, BJP-in ZPM lam an hawi tak dan te a sawi a. Kha thu kha ZPM VUC member te tan ngawih bopui chi a ni lo; Kristian thinlung atanga BJP thawhpui duh miah lo hi ZPM ah an awm teuh ka ring, mahse tun thlengin ZPM in Pu Zoramthanga sawi kha an la chhang let lo. BJP in an rawn puih party te hi term 1 chu an sawrkar ve mai a, mahse term 2 chu an sawrkar nawn bik ngai lo," a ti.

Healthcare chungchang sawiin, Dr.Lallianchhunga chuan, "Congress hunlaiin mipuite tlin tawk Healthcare kan kalpui thei a. Kalphung thar Healthcare hi chu sawrkar hnathawk awm ve lohna chhungkaw tam tak tan inziah luh man a to lutuk avangin an tlin ve lo va, a tlin ber tura ngaih sawrkar hnathawk ten an do bur bawk a, dan hmang thlenga do turin an inbuatsaih mek a ni."

"Pensioner tan Barluih Healthcare a ni ringawt bawk a, ‘tuna in tih nghal loh chuan, nakinah in inziah luh (register) duh hunah late fee in chawi ang’ tiin Healthcare an Barhlui a ni. Private Hospital lian ten Kalphung thar Healthcare hi an pawm thei lo bawk a. Aizawl-ah chuan Civil Hospital leh ZMC a khum chan loh chuan healthcare a inziah luh awmzia a awm lo. Damlo tam tak ten Kalphungthar Healthcare vangin harsatna an tawk mek a ni," a ti bawk.

Dr. Lallianchhunga chuan, "ZPM Minister te hian sawrkar kal tawhte thiam taka bei ngar ngar chungin sawrkar nawn leh an tum a ni ber a. Hmasawnna ruhrel din thupui berah an nei lova, Mizoram sum leh pai dinhmun tluchhe mek siamthat an thupui ber a ni lo. Mipui atangin chhiah an la awk awk a, chumi hmang chuan an party hotute sawrkar atanga hlawh la thei turin Political Appointment an pe chur chur a, sawrkar zarzo thei tura an party hotute siam hi an thupui ber zinga mi a ni. Mipuite phurrit chhawng zangkhai tur leh sumdawngte tana sumdawnna boruak tha zawk siam leh turin Congress party kan sawrkar leh a ngai a ni," a ti.