ZALEN August 21, 2025 : MNF MLA pathum Er R Rohmingliana, Rasik Mohan Chakma leh Prova Chakma te chuan August 19 - 21 chhung hian Lalrintluanga Sailo (L) bial thin Dampa South Block khaw hrang hrang hrang an tlawh a. Khaw hrang hrang mipuiten an lo lawm hle a ni.

MNF MLA pathumte hian tun dinhmunah Dampa bialin bialtu MLA nei rih loh mah se, an theih ang angin Dampa bial mipuite chu buaipui a, tanpui zel an tum thu an sawi a. An bialtu MLA thin Lalrintluanga Sailo ang maia bialtu MLA tha an neih leh ngei an beisei thu an sawi bawk a ni.

Dampa South bial mipuite hian MNF MLA pathumte hnenah hian, MNF sawrkar laia hmunphiah kg 1 Rs 100 chung lama an hralh zung zung thu an lo sawi a. Chutih laiin tun sawrkar hnuaiah hralh zawhna tur an hmuh loh thu leh man tlawmte tea an hralh thu an lo sawi a. MNF MLA te hian a theih ang anga House-ah te lo aupui an tum thu mipuite hi an hrilh a ni.

Dampa bial an tlawh zawh hian MNF MLA te hian Thorang bial Marpara South an tlawh a. Mipuiin an lo lawm hle a, Party hrang hrang atangin voter 15 MNF-ah an lawmlut a. He hunah hian R Rohmingliana MLA chuan ration buhfai nasa taka tihto a nih tak avanga khulhna tur nei mumal lo an awm chu pawi a tih thu a sawi a. MNF sawrkar laiin hmuhphaih Rs 130/- tea an hralh laia tun sawrkara hralhna an hmu mumal lo chu pawi a tih thu a sawi a. ZPM sawrkar chu kuthnathawktute ngaisaktu sawrkar a ni lo a ni, a ti.

Prova Chakma pawhin thusawiin, Thorang bial leh West Tuipui bial atangin MNF MLA an vawikhat awmna a nih thu a sawi a. ZPM sawrkar chuan nasa takin pawisa an puk reng a, chhiah nasa takin an tipung mek zel a ni, a ti.