Aizawl June 27, 2023 : Vawiin khan Tawi East Block Conference Saitual Auditorium-ah neih a ni a. He huna khuallian Chief Minister Zoramthanga, MNF President ni bawk chuan hna thawk lo anga sawi thin te chu MNF sawrkar hnuaia a hmasawnna en turin a ti. ZPM chu an chapona avangin an talbuai mek niin a sawi.

Zoramthanga chuan, "MNF-in engmah a ti lo ti thin te hian, MNF sawrkar hnuaia hmasawnna tam tak te hi en rawh se. MNF sawrkar hian a thil tih tum ang a ti lo tia dem tute hian, Covid vanga khawvel ramdangten an tih tum an tih bik lohzia an hriat a ngai a. Dam khawchhuah kan tum hram hram zawk a ni, "a ti. 

MNF President chuan ZPM chungchang sawiin, "Danbua inziak lo, Leader nihna inpek ngawt mai chu thuneihna inpek dan thiam a harsa dawn a. Thuneitu ber pawh hriat theih an ni lo. An chapona avangin an talbuai mek a, kalphung thar hritlanin an hritlang a, an bang sup sup mai a ni," a ti. MNF mipuite chu enge maw avanga hnual mai lovin, phur tak leh thahnemngai taka bei zel turin a sawm a. "MNF hi a sawrkar leh ngei dawn a ni," a ti bawk. 

Zoramthanga chuan, "Manipur Chief Minister nen an inbiaknaah, MNF hian a din tirh, October ni 22,1961 atangin Zohnahthlak inzawm khawmna chungchang kan lo buaipui daih tawh tih thu ka hrilh a. Tun thlengin MNF chuan Zofate rorelna pakhat hnuaia awm hi kan la bei reng a. Pathianin mak tak leh hriatthiam harsa takin min hruai zel a ni. MNF hian harsatna tam tak a lo paltlang tawh a. Tun thlengin harsatna chu a la tawk reng. Amaherawhchu, 'Pathian leh kan ram tan' tih thupui kan en tlat a. Hruaitute that leh fel vang ni lovin, Pathianin harsatna a ta min dawmkang zel thin a ni. 'MNF hi an ral mai dawn' ti thintute leh nuaibo tumtute chu anmahni an ral vek tawh zawk. Tuipui sen chunga roreltu, Babulon saltang hruaitu Pathianin MNF a hruai thin a. India rama party upa ber zinga mi leh tlo berte zinga mi a ni," a ti. 

Khualzahawm Power Minister R. Lalzirliana, MNF Adviser pawhin thu sawiin, "Politician ni lo ten politics an khelh hian harsatna a thleng thin. An hruaitu ber pawh hriat hleihtheih loh, party hrang hrang atanga kal khawm, hming thlak fo thin ZPM-te an talbuai mek. Tunhnaia inthlan thenkhatah hnehna an chan avangin, chapona tlangah an chuang a, chu chuan buaina a thlen. Congress ai pawhin an ruhrel a la te daih zawk a ni," a ti.

Zira chuan, "Tawi bialah hmasawnna hmuh tur a awm leh MNF sawrkarin sum harsa tak kara Saitual District implement hi a lawmawm hle a ni. Nationalist CM kan nei hi a chhuanawm hle a. MNF a sawrkar leh ngei a rinawm a ni," a ti bawk. 

Thusawitu dang Lalrinenga Sailo, AMC Mayor chuan MNF a sawrkar leh ngei theih nan theihtawp chhuah turin party mipui kalkhawmte a sawm bawk.