Aizawl June 27, 2023: Mizo Hnam Sipai (MNF Returnees) te tana Maumual, Chaltlang rama chenna In ngaihtuahsak tura din “Maumual Development Committee for MNF Returnees” chu an Chairman, Revenue Minister Lalruatkima hovin an thukhawm a, Hose Site Plan siamthat a nih dan te an sawiho.

Ruatkima chuan, sawrkarin Ex-MNA te In leh lo ngaihtuahsak chu a ngaihpawimawh avangin theihtawp chhuahin hmalak reng a nih thu a sawi a, 1987-a siam House Site Plan chu thiamna changkang zawk hmanga siam that a ni, a ti. Land Revenue & Settlement Department chuan mumal taka survey nei tawhin, plot pawh siamfel anih thu a sawi a, siamrem ngai la awm te pawh siamrem nghal zel tura hmalak a nih thu a tarlang.

Land Revenue & Settlement Minister chuan Maumual ram theh chu phase hnih a kalpui anih thu tarlangin, Phase-I ah hian SEDP atangin cheng 5,00,000 dah niin phase-II kalpui thuai anih theih nan turin hmalak tan mek a ni, a ti. Lalruatkima chuan, "Maumual ramah khawpui felfai tak din a ni dawn a, mimal ram bakah hian mipui vantlang hmunhma tur - Anganwadi, School, Taxi stand leh a tul dangte awmin, In tin kawngpui tha takin a pawh vek dawn," a ti bawk.

Lalruatkima chuan 1986-a India sawrkar leh Mizo National Front ten inremna thuthlung an ziah hnua hnam pasaltha rawn hawte pualin Maumual ram hi theh a nih thu a sawi a. A hmun hi khang hun lai kha chuan hla deuh leh thlaler deuh anga a lan avangin chenna in sa duh pawh an awm mang lo niin a lang a, tunah erawh chuan chutiang a ni tawh lova, hmun tha leh rem tak a lo ni tawh a ti. 

Revenue Department in survey an neih atang a House Site Plan/Plot- an siamte an thlirho bawk a. Ruahmanna ang chuan July thla chhung peihfel tum a ni.

Thutkhawm a report a nih danin Maumual ram chhunga ram nei in report zat hi mi 863- an ni a. Report lut atanga House-Site Plan chhunga awm tih hriat mai theih hi 452- awmin, Plan chhunga mi tih hriat mai theih loh 411- an awm mek a ni. Plot allotment siam zawng zawng chu 677- niin plot cancel leh a ram neitute kuta pek 61- a awm a ni.

Vawiin thutkhawm ah hian Land Revenue & settlement, PWD leh DM&R hotute bakah MNF Returnees- aiawh an tel bawk a ni.