Aizawl : Vawiin November 11, 2022 Congress Party Friday Political Session, Congress Bhavan, Aizawlah neih a ni a. He huna thusawitu MPCC President Lalsawta chuan MNF sawrkar chu Mizoram tan an that loh em avang an bei dawn chuah tih a sawi a, Mara District-a an thlawpna pawh an duh hun hunah withdraw se pawi an tih loh thu a sawi bawk. 

MPCC President, Lalsawta chuan, "MNF sawrkar hi Mizoram tan an that loh em avangin nasa takin kan la bei dawn chauh. Mara District-ah min sawm nasat em avang leh Mara lama kan hruaituten Mara mipui an ngaihtuah em avangin sawrkarna an siampui a. Hei hi Congress Party-in mipui tana kan hmalakna turah min daltu tur a nih dawn chuan Mara District-a min support-na pawh saw MNF hian withdraw mai rawh se. Mara District-a min thlawp avanga Congress Party hi zuamawma min ngai a nih a, an zarzo tu anga min ngai dawn a nih chuan an duh hun hunah withraw rawh se," a ti.

Lalsawta chuan, "Vawiina hna tul dang kalsana Party tana hnathawktu zawng zawngte hi Party worker an ni lo, ram leh hnam hmangaihna avanga chan huama thawktu, sawrkar tha siam duh avanga lo kalkhawm thin an ni. Communist ramah chuan inkohna bikte neiin Party worker lal tak tak an awm thin a, mipui nawlpuiin an hlau em em thin, hetiang ang hi Mizorama Party mite hi an ni ve lo," a ti bawk. 

Danglam ngam a ngai tawh tih sawiin, "Mizoram hian hun reilote chhungin hun thar kan chuang kai tih i hria ang u. Mipui hian thil thar an duh a, an beisei tlat tawh. Keini pawhin tunhma a kan tih thin tam tak te kha kan tih a rem tawh lo. Mipui hian sawrkar tha, eiru lo, mipui hmangaihtu an duh tawh. Mi leh sa ngai reng pawh ni mah ila, kan rilru leh ngaihtuahna hi kan siamthar a ngai a ni. A hlui ang ringawta kal tumna hi i bansan ang u. Kan danglam ngam tur a ni. Mipui rawngbawlna hi kawng nuam a ni lo a, kawng chho, kawng hahthlak tak a ni; nawmsak tum tan mipui rawng a bawl theih loh. Kan tawrh a ngai a, kan inpek a ngai. Ram siamthat kan tumnaah hian kan party kan sorkarna tur a nih phawt chuan kan inpek ral a ngai dawn, 'A tul chuan midang ka kian thei e,' kan tih ngam hial a ngai ang," a ti.

MPCC President chuan, "Mizoram hi eirukna nen natna chi hrang hrangin min bawm mek a. Heng zawng zawng hi Congress hian Pathian tanpuina zarah a damdawi kan nei e. Keini chu kan corrupt ve lo ang, keini chuan mipui kan hmangaih a, an tana tha tur hlirin kan ti dawn. Vawiinah hian thil tih theih loh ka sawi lo, ram danga pawh an tih theih, keini pawhin kan tih theih ve ngei thil ka sawi a ni," a ti bawk.