Aizawl December 6, 2022: MPCC chuan December 2018-a MNF sawrkar a pian hnuah Mizoramah rorelna fel hmuh tur a awm lo a, danin ngaihpawimawh a hlawh hek lo. MNF sawrkar hnuaiah Dan ang taka rorelna (rule of law) a bo zo a, Mizoram dinhmun a chhe takzet ta a ni, an ti.

Congress chuan, "Tunhnaia Mizoram tlawhtu, Union Minister of State John Barla chuan Ministry of Minority Affairs hnuaiah cheng vaibelchhe 1000 chuang Mizoram sawrkar hnenah pek a ni tawh a, mahse, Mizoram sawrkarin sum hman dan report (Utilisation Certificate) pek tur a nei lo tih thu a sawi a. Union Minister of State, Food Processing Industries leh Jal Shakti enkawltu Prahlad Singh Patel pawhin cheng vaibelchhe 75 senga siam Kolasib District-a Mega Food Park-in a rilru a tih nat thu a sawi bawk. Heng zawng zawng hi MNF tih chingpen vek a ni. State Referral Hospital, Falkawn leh Tuirial Hydel Project ang bawkin an sawpchhe zo leh mai ang tih hlauhawm tak a ni," an ti.

Lunglei Zohnuai a Science Centre sak mek, cheng nuai 65 senna tur, PWD thawh mek chu CM leh an bialtu MLA duh dan angin civil mi HS Laltlanzara, Zotlang, Lunglei chu Work Supervisor atan ruat a ni bawk a. Hei hi sawrkar kalphung kalh tlat niin, MNF sawrkarin dan an zah loh zia leh sawrkar hnathawkte an rin loh zia tilang chiangtu a ni, Congress chuan an ti bawk.

MPCC chuan, "MNF sawrkar hnuaiah hian dan lo a hnathawh, dan lo a hnathawktu lak leh dan bawhchhiatna chi hrang hrang a hluar em em a. MNF sawrkar hnuaiah Smuggler-te an zalen mai a ni lo a, MNF hruaitu lawk tak takin an thlavang an hauh zawk emaw tih tur a ni a. Tin, Drugs a hluarin, Mizo thalai tam tak Drugs hmansual vangin an thi mek a, chhungkaw tam tak mangang takin kan rum mek a ni," an ti.

Sum leh pai enkawlna chungchangah MNF sawrkar a hlawhchham let der a. Sum leh pai hman dan fel lo lutuk avangin Mizoram chu Leiba Thang (Debt Trap)-ah a tang chho mek a, sawrkar hnathawkte hlawh leh pension pawisa te, healthcare bill thlengin pek theih a ni lo a. Hetiang taka sum leh pai enkawlna a hlawhchham sawrkar hi Mizoramah a la awm ngai lo niin an sawi. 

MNF sawrkar kal dan en hian Mizoram siamthat tum aiin tihchhiat vek an tum emaw tih mai tur a ni a. Hetiang taka sawrkar tha lo hi Mizoramah a la awm ngai lo. MNF sawrkarah MLA tha tak tak, mi thiam tak takte awm bawk mah se, CM Zoramthanga leh a chekawiten che thei miah lovin an siam a, MLA tha tak takte zingah MLA a din zui phur loh phah an awm nual niin Congress chuan an sawi bawk.