Aizawl November 4, 2022 : MPCC Campaign Committee ruahmannain Oct 29 – Nov 3, 2022 chhung khan Aizawl Local Council huam chhunga Congress Unit tlawhchhuahna hun an hmang. Laipuitlang leh Bungkawn an tlawh tuma hun hmang tu MPCC Spokesperson Dr.Lallianchhunga chuan, "Mipuite beisei pha lo MNF sawrkar lakah hian mipuite’n thutlukna kan siam fel tawh; Eng ram mahin Enchhin sawrkar (Experimental Government) an duh lo. Mi tha ni a an hriat, an hriat chian sa an thlang thin zawk a ni," a ti.

Dr. Lallianchhunga chuan MNF chungchang sawi langin, “MNF sawrkar hi lal Saula hun hnuhnung ang mai kha a ni a; Pathian hriak thih Davida tan lal Saula beih nan hun a uihawm lutuk. MNF sawrkar hi Eptu party ten an beih ngai miah loin an thiltih that lohin a rawn vaw let zel. CM fanu in doctor kut a thlak te pawh eptu party te hmalak vang a ni lo. Kamrula Chhangte te bakah, Assam sawrkar Wanted Abu Majumdar te nena sam an inphiar zawm dan te hi Mizo mipuite’n kan hria, MNF lakah hian mipuite’n thutlukna kan siam fel tawh” a ti.

ZPM chungchang sawiin, “Congress party chuan enchhin pawh ngai lo, sum leh paia mi rinawm, Mizoram sawrkar sum dinhmun siam tha theitu tur hruaitu kan nei. Khawi ramah mah ‘Min enchhin ve rawh u’ tiin party an inzuar ngai lo. Eng ram mahin ‘Enchhin sawrkar (Experimental Government) an duh lo. Mi tha nia an hriat, an hriat chian sa an thlang thin zawk a ni," a ti.

Laipuitlang leh Bungkawn Unit tlawhchhuahnaa Team Leader, Dr. Lallianchhunga MPCC Spokesperson chuan, "Tang Puihna’ hi rilru siam thatna (Moral reformation) nena inkawp tlat a ni a, Bible zirtirna nena inmil Manifesto a ni. Pathian thu chuan, 'Tupawh thawk lo chuan ei pawh ei suh se' (2 Thessalonika 3:10) tiin min zirtir a. Dinchhuah tuma theihtawp chhuahtute kan kalsan dawn lova, an mamawh dan a zirin cheng nuai bi atangin, mamawh intawm a nih phei chuan cheng vaibelchhe tel thlengin kan pui dawn a ni," a ti bawk.

Congress party chu Zoram tana rotling (asset) siamtu a ni thin tiin, Dr. Lallianchhunga chuan, “Congress party hian Pathian zarah sorkarna a siam laiin sawrkar hmasate hmalak tawhna chhunzawmin a tipuitling thin. Compensation avanga hluihlawn tawh Tuirial Hydel Project pawh a siam puitling leh a; Dec 16, 2017 a hawn a nih atanga Mizoramin a thlawna kawlphetha a dawn hlut zawng chu cheng vaibelchhe 30 chuang man a ni tawh a, Tuirial Hydel Project in power a siamchhuah zawng zawng hi Mizoram sawrkarin a lei vek bawk a ni. Falkawn a Referral Hospital pawh MNF sorkarin Ar Vulhna atan lo hmang tawh mah se,  Mizoram mipuite’n kan mamawh zia hriain Damdawi lam zirna In sang changtlung tak ni turin a buatsaih a, COVID-19 hripui leng karah pawh a tangkaizia mipuite’n kan hria a ni’ a ti.

Aizawl Khawpui chhung Congress Unit tlawhchhuah programme-ah hian Team Leader ruat zel a ni a, thusawi zawhah Unit member te nen zawhna leh chhanna hun an hmang zui thin bawk a ni.