Aizawl: BJP Mizoram State President Vanlalhmuaka chuan, "MNF sawrkarna hnuaia kan awm lai hi 'Hun tha lo' a ni," a ti.

BJP Mizoram Pradesh in Zirtawpni kaltaa an office Upper Republic a Political Session ah thu sawiin State President Vanlalhmuaka chuan, "Mizoram State sawrkar hian Central programme tih hlawhtlinna tura pawisa an dawn pawh an chingfel thei lova, mirethei, mahnia in sa thei loten in an neih theihna tura Housing for all atangin Central in pawisa a rawn pe fel tawh a. Miretheite chanvo pawh chu MNF sawrkar hian a pe kim thei lo a ni," a ti.

Hmuaka chuan, "India ramin kum 1947-ah zalenna kan hmu a, kum 2014 ah India ramah Modi-a Prime Minister a rawn nih hnu ah retheihna laka ta zalenna kan nei leh a. Mizoram pawh tunah hian retheihna sal-ah kan tang leh mek a, nimahsela kum 2023 MLA General Election lo awm tur hi retheihna sala kan tanna atanga Mizoram kan chhuah hun tur a ni dawn a. Chumi atana tawtawrawt hamtu chu BJP te kan ni," a ti bawk.