Aizawl : Nimin khan Aizawl District Congress Committee huaihawtin Political Training neih a ni a, he hunah hian Congress Legislature Party leader Zodintluanga chuan MNF sawrkar hi Congress sawrkar hnathawh thatzia tarlang tura Pathian ruat nia a ngaih thu a sawi.

“MNF sorkar kan hrawn mekin kum 2 a tling ve tep ta mai a, Mizoram tana hnathawh pawimawh sawi tur an nei lo hle. An che hlek a, an chesual nghal zel mai a ni ber. Kum 2 an sorkar dawn chauh tihah Mizoram tana thil pawi tak tak eng emaw zat an ti hman a, MNF sorkar hi rintlak a ni lo tih mipuiin an hre leh hman der tawh a ni. Chuvangin, MNF sorkar hi Congress sorkar hnathawh thatzia tarlang tura Pathian ruat an ni tih hi kan hriat a ngai a ni,” a ti.

Congress sorkar hnathawh that chu COVID-19 avangin zep rual lohin a lang chhuak niin a sawi a, Congress sorkar khan hmasawnna hna lo thawk tha lo se chuan COVID-19 avang hian dinhmun chhe lehzualah kan ding dawn a lo ni reng niin a sawi bawk.

Zodintluanga chuan Congress sorkar leh hnua Referral Hospital dinthar leh chu Medical College hial a din chhoh Zoram Medical College (ZMC) tia MNF-in a hming an thlak tak chu COVID-19 veite enkawlna hmunpui atan hman a ni ta hial a. Congress sorkar khan Referral Hospital hi lo tihlawhtling lo ta se kan buai hle dawna a hriat thu a sawi.

Bairabi Rel Station chungchang pawh sawiin, “Congress sorkarin a pawimawhna tur hriain Bairabi rel station a siam a, rel lian tlan theih tura a lo tihlen avangin COVID-19 vanga phai lam atanga lo haw tam zawkten awlsam takin Mizoram an lo thlen theih phah a ni,” a ti.

Compensation lak hnem lutuk avanga hluihlawn hman Tuirial Hydel Project chu Congress sorkarin tharthawhin a din thar leh niin a sawi bawk.

MNF sum enkawl kalhmang a hmuh dan a sawinaah Zodintluanga chuan, “MNF sorkar kum 5 a liam hnuah COVID-19 hi lo thleng ni ta se, an sum enkawl dan thlirin kan dinhmun a chhe ngawt ang. Sorkar hnathawk hlawh an pe kim thei lo a, mipui thawhkhawm CM Relief Fund hmangin COVID-19 an do a, titha an inti em em ringawt mai a ni. Finance Minister berin sorkar sum kalhmang a hre thlawt lo a ni tih chiang taka hai lan a ni tawh bawk,” a ti.

“MNF sorkar hian mipui rin a hlawh tawh lo a, kum 10 Congress sorkar aiin MNF kum 2 sorkar hian mipui nin an hlawh tawh zawk. Chuvangin, ding chhuak leh nghal turin Mizoram hmun hrang hranga Congress Party mite rilru thar nen kan chet chhuah leh nghal a ngai ta a ni,” a ti bawk.