Aizawl April 10, 2024 : MNF Thalai chuan Mizoram Chief Minister Lalduhawma chuan Shillong a zinna ah Mizoram sawrkar hnathawkte a chhethei ang berin a puh an ti a, “Pawl ang te, Association ang te, a Department pum ang te a vawiin ah hian min do let an tum mek a ni. A bik takin Police Department ah chu chu a awm mek a ni’’, tih thu a mah kawmtute hma a a sawi chu mak an ti.

Mizo National Youth Front (MNYF) Headquarters chuan, "He thil hi thudiklo hmanga sawrkar hnathawkte putchhiatna ni ngei a kan hriat avang leh, a thusawi hi Mizoram sawrkar hnathawk te hmai tibaltu a nih avangin kum 2024, April ni 18 (Ningani) hma ngei a Mizoram sawrkar hnathawkte chunga ngaihdam dil turin Chief Minister Pu Lalduhawma hi kan phut a ni," an ti.

MNYF chuan, "Hun reilote Chief Minister a nih chhungin Pu Lalduhawma hian Mizoram sawrkar hnathawkte diriam zawngin thu a sawi hnem tawh hle a. Assembly Budget session neihzawh takah pawh khan Mizoram Police te chu nasa taka diriam in, Mizoram mipui hma ah, Mizoram Police te chu thlamuanpui tlak an nih loh thu uar takin a lo sawi tawh a; hetianga kan ram hruaitu lu berin a hnathawkte rilru tihnual thei zawnga thu a sawifo mai hian Mizoram sawrkar inrelbawlna kawngah ngawng thalo a nei ang tih kan hlauhpui hle a ni," an ti bawk.