MNF Thalai President-in principle nei lovah ZPM puh
![](/storage/news/post/tWKgjyn5ya3zif9KdwdZbYdW2r3vN7HUWkPQTxDa.jpg)
Aizawl April 27, 2023 : MNYF President Dr L. Thangmawia, MLA chuan Mizo hnam hmangaihna avanga kum 20 chuang ZNP lo vahvaihpui tawhte leh Mizo thalai hnam vei zawng zawngte MNF-a haw khawmzel turin a sawm a, ZPM chu principle nei lovah a puh a, a thil tih dik lovah ngaihdam a dil.
Vawiina khan MNF Lengteng North Block (chuan hnuai) Political Training, Chiahpui Community Hall ah neih a ni a, he hun hmanpuitu MNYF President Dr. L.Thangmawia MLA chuan, "ZPM hian Mizo Nationalism chawisan lam an hawi in a langlo a, mi tlinlohna zawnkhawm leh issue based-a politics thiam taka kalpui bak an danglamna kan la hmu rih lo. Kalphung thar an zawrh hi tuna an kal mek dan a nih phei chuan Principle nei lo, nikum lawka an duhloh kha kuminah phur taka kalpui leh thei mai zel, Lalna leh thuneihna chan ngawr ngawr ngaihtuah a Mizo mipuite vehthlem mektu an ni a, an hlimthla hi thilchik mite tan chuan chiang takin a lang tawh a ni," a ti.
Thangmawia chuan ZPM zinga member ngah ber ZNP chu tunhnaiah thiam taka suihtet in an awm mek a ti a, Hnam hmangaih (Nationalist) avanga kum 20 chuang ZNP a lo awm tawh te leh Mizo thalai hnam vei zawng zawng te, Mizoram hnam tana kum 60 chuang Pathian hruainaa nghet taka ding mek Mizo hnam inpui MNF ah lawilut zel turin a sawm bawk.
MNF Thalai president chuan Lengteng bialtu MLA-a thlantlin a nih chhan chu politics-a thiam vang ni lovin, Pathian in bial mipuite rilru a hna a thawh vang a chauh a ni, a ti a. Kum 4 chhung hian Lengteng bial mipuite chungah tih tur tih loh tamtak neia a inhriat thu leh tih loh tur tih zawk pawh tam tak a neih a rin thu a sawi a, "Heng zawng zawngah chuan Lengteng bial mipuite ngaihdam ka dil a ni," a ti.
Lengteng bialtu MLA, Dr L.Thangmawia chuan, "MNF hian beihna nasa tak a tawk mek a, hei hi kan inenfiahna tura Pathianin rem min ruatsak a ni tih pawm ang u. Kan tih diklohte thupha chawi a, kan ram leh hnam tana tha zawka kan thawh theihnana kan rilru tuaithar nan hmang zawk i la, term leh pawh awlsam takin Pu Zoramthanga kaihhruaina hnuaiah sawrkarna kan siam leh ngei ang", a ti.
Latest News & Chhiar Hlawh
-
1m | Sep 07, 2024
-
2m | Sep 07, 2024
-
1m | Sep 07, 2024
-
1m | Sep 07, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
3m | Sep 06, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
1m | Sep 06, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 05, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 04, 2024