Aizawl July 21, 2023 : July ni 20, 2023 (Ningani) chawhnu-a Zoram People Movement (ZPM) Office kawtah ZPM MLA Vanlalhlana car driver-in Republic veng tlangval kutthlaka a nghaisa tih an hriat velah MNF thalai chuan an bawhzui nghal niin an sawi a, pawikhawihtu driver hi nizan lama man niin tukin zingah lakchhuah leh nghal a ni tih an sawi.

MNF thalai hruaitute chuan Republic veng chhunga tharum thawhna thleng chungchang hi vawiin khan Aizawl Police Station ah an zawtfiah a, mi kutthlaktu ZPM MLA driver Samuel Lalngaihawma hi nizan dar 1 velah Mizoram Police ten man mah se, tukin zinglamah Aizawl PS atanga lakchhuah leh nghal a ni, tih an va hria a ni.

Republic Veng Local Council Chairman chuan ni 20, July, 2023 zandar 12 ah khan Aizawl Police Station-ah thubuai (FIR) a thehlut a, hemi zan vek hian Mizoram Police te chuan pawikhawihtu hi man nghalin thubuai chi hrang hrang pathum- Mi kawngkal lai tihbuaina thubuai IPC Section 341, midang tihnat tumna thubuai IPC Section 352 bakah, midang laka hliam thlenna thubuai IPC Section 323 te ziah luh a ni. MNYF Headquarters' chuan pawikhawihtu hi dan ang a hremna pe ngei turin thuneitute an ngen a, Republic veng mipui leh khawtlang hruaitu kiangah MNYF Headquarters chu an ding reng dawn an ti.

MNF Thalai chuan, "Sawrkar hmasa Congress hunlai pawhin michak lo leh dinhmun hniam zawkte lakah hleilenna a lo thleng tawh thin a. Tunah kalphung thar mipuite tiamtu ZPM MLA driver pakhatin mi chak lo zawkte lakah khaw êng pawh zah lo a tharum a hmang duh mai hi a vanduaithlak kan ti a. ZPM rim kaite'n tun atanga mi chak lo zawkte laka tharum an thawh duh nghal mai a nih chuan ZPM hi mipui tan enchhin chi an ni lo tih hi an mahni hian an tarlang zelah kan ngai a ni," an ti.