ZALEN July 14, 2025 : Vawiin hian Mizo Hnam Runah chhung inkhawm neih a ni a, MNF President Zoramthanga chuan thu a sawi a. Party mite chu hrereng tura a duh thu pawimawh chahin, "MNF dam khaw chhuahna hi Lalpa rawngbawl tur leh, ram leh hnam Pathian tana vawnghim a, tihhmasawn a ni, tih hi MNF zawng zawngin vawng reng turin ka duh a ni," a ti.

Zoramthanga chuan, "MNF kan sawrkar a, kan tla leh thin a, kan sawrkar leh thin a. Hengte hi kan tan a tha a ni. Kan insiamthat nan leh kan inzir fin nan kan tla thinte hi a tha a ni," a ti a. "Mizoramah Political Party 30 chuang a lo ding tawh thin a. Tun thlenga hnam party la ding awm chhun hi MNF chiah kan ni. Mizo Union leh PC te kha ral thei lo tura mawi an ni, an chak em em a. Mahse, an awm ta lo. MNF erawh kum 64 Pathianin min hruai ta a, kan chak zual zel a ni," a ti.

MNF President chuan, "MNF party hian harsatna a tawk lo bik a ni lo a, harsatna tam tak karah pawh 'Pathian leh kan ram tan' tia Pathian hming kan lam tlatna chu Pathianin mal a sawm a ni," a ti a. "Isua vana a lawn dawna thu min pek 'thilsiam zawng zawng hnena chamchintha hrilh' hi MNF innghahna leh thil tum bulpui ber a ni a. Hei hi MNF mi leh sa zawng zawng chuan vawwg tlat turin tun hunah hian ka chah duh a ni," a ti bawk.

Zoramthanga chuan ama chanchin ziahna lehkhabu 'From Rebel To Leader' tih chu khawvela publishing company lian ber pawl Penguin-in an chhuah sak dawn tih a sawi a. Hemi tur hian inremna pawh an ziah fel tawh thu a sawi a. A lehkhabu a chhuah hunah zalenna sual laia thil thlen dan dik tak a hriat theih dawn, tih a sawi a. "Mizo Nationalism hi Pathianin a tawp mai a phal lo. A sang tel nunna hlanna leh a sing tel tawrhna avanga lo piang Mizo Nationalism hi a vul zual zel dawn a ni," a ti.