Aizawl: MNF Thalai chuan India rama Covid-19 dona kawnga titha lawmman pek tur ni se, Mizoram chu a dawng hmasa ber anih an ring tih an sawi.

Nimin khan Aizawl Press Club-ah thuthar thehdarhtute kawmin MNYF Vice President Lalzahawma Khiangte chuan, "Kan rama hrileng hi ram dang leh state dang nena tehkhin chuan a nem (moderate) hlein kan hria a, hei hi kohhran miten nasa taka Pathian an auhna rahniah MNF Thalai chuan kan ngai a. Tun hnaia VillageCouncil/Local Council inthlana MNF party chet that chhan pawh mipuiin Covid-19dona kawngah sawrkar hmalakna an rintawkzia an lantirnaah kan ngai a, India rama Covid-19 dona kawnga titha lawmman pek tur ni se, Mizoram chu a dawng hmasa ber kan nih ngei pawh kan ring hial a ni," a ti a. Covid-19 dona kawngah CM Relief Fund-a phal taka an MLA fund thawhtu ruling MLA te, independent MLA te leh BJP MLA bakah, mimal leh pawl hrang hrangte chungah MNF Thalai chuan lawmthu an sawi bawk.

MNYF President chuan Mizoram pumpuiah Covid test kalpui dan tur kalphung fel leh mumal tak siam a ni tih sawiin, "Ruahmanna fel tak a neih avang hian Covid-19 test zawng zawng 99% zet chuan a thlawnin an test thei a, chutih laiin 1% chauhvin subsidized leh man pangngaiin test man an chawi a. India ram state dang tam takin Rapid Antigen Test (RAT) man chawia an kalpui laiin Mizoramah chuan a thlawn liau liauvin tun thleng hian kalpui mek zel a ni, tiin a thlawna test kalpui anih avangin hripui darh tur pawh a veng nia an ngaih thu a sawi. Covid test chungchangah eptu Congress thalai chu thil hrechianglova thu sawiah puhin, "MPYCC President-in thuthar thehdarhtute hnena RT-PCR test man Rs. 4500 char char hmang anga a lo sawi hi thil a hre chiang lo hleah kan ngai a, Rs. 4500 chawi turte hi mahni duh thua test-te leh Covid free certificate dilte tan a ni a, a dang chu subsidized leh free test vek zawk a ni," a ti bawk.

Tun hnaia ZLP hruaitu Lalduhoma'n Covid-19 dona kaihhnawiha Mizoram sawrkarin sum a hman theih tur cheng vbc 1061.03 nia a sawi chu budget a hre chiang lo hle ah an ngai tih sawiin, "Sawrkar sum hmuhna a rawn sawi zinga pakhat State Disaster Response Fund (SDRF) 1st Installment Rs. 2350 lakhs hi a vaia Covid-19 dona atana hman tur anga a rawn sawi hi mipui bum tumna a ni a.”

“Ministry of Home Affairs (MHA) guideline ang chuan SDRF sum hi 35% chauh Covid-19 dona thilah hman theih a ni," tiin "Devolution of Taxes, March-September 2020-a Rs.71100 lakhs pawh hi Covid-19 do nana kan hmuh ni lovin kan sum hnar pangngai, sawrkar hnathawk hlawh leh pension hlawh atana kan hman ber thin a ni a. Hetianga thu dik tawk lo hmanga mipui hruai sual theihna tur thu sawi fo tawh lo turin kan MLA zahawm tak hi MNF Thalai chuan kan ngenin kan chah a ni," a ti bawk.