ZALEN March 18, 2025: Mobile connection tha lo leh signal mumal lo thin avangin NREGS hnuaia ni za inhlawhna hlawh lak chungchangah harsatna a awm thin niin chief minister Lalduhoma chuan House-ah a sawi.

Budget session neih meka zawhna leh chhanna hunah chief minister Lalduhoma chuan thingtlang khaw thenkhat phone signal awm lohna khuate'n ni 100 inhlawhnaa thawk, a ni la laa SMS hmanga portal-a in report ngai thin te chuan harsatna an tawk tih sawiin, "A ni la la a an in report theih loh avangin hlawh la thei lo te an awm thin," a ti.

Ni 100 inhlawhna thingtlang mite'n hlawh an lak har deuh changa state sorkar sum neihsa hmanga lo pek sak a, a hnua hnawhkhah leh a rem ve loh thu sawiin chief minister Lalduhoma chuan, "CSS thenkhatah chuan sum awmsa hmangin an hlawh pek lawh theih a ni a, a hnua hlawh tur alo thlen hunah dahkhah leh mai thin a ni a, mahse NREGS hlawh chu a thawktute account-ah thunsak a nih avangin a remchang ve lo," a ti.

Mizoramah hian mobile phone connectivity a tha ve viau tawh a, chutihlaiin Lawngtlai district hmun thenkhat leh Bangladesh leh Myanmar ramri lamah signal awm lohna ala awm nual a ni.

Mizorama phone connectivity tha zawk leh khaw tinin signal tha an neih theihnan tunhnai khan ICT Secretary Amit Sharma chuan BSNL, Reliance Jio leh Bharti Airtel hotu liante kawmin hmalak ho dan tur alo sawipui tawh a ni.